Спорт

Кулун тутар 1 күнүттэн 4 күнүгэр диэри “Дохсун” спортивнай комплекска 2007-2008 сыллаах тѳрүѳх уолаттар икки ардыларыгар ССРС хас да төгүллээх чѳмпүйүѳнэ, призера, Үтүө санаа оонньууларын призера,1992 сыллааҕы Олимпийскай оонньуулар кыттыылаахтара, норуоттар икки ардыларынааҕы категориялаах спорт маастара Анатолий Никитович Филипповка анаммыт сылын аайы ыытыллар боксаҕа өрөспүүбүлүкэ сүрүн күрэҕэ буолла.

Быйылгы күрэх Анатолий Никитович 60 сааһыгар ананна. Күрэххэ 23 хамаандаттан 136 оҕо кытынна. Бу күрэх өрөспүүбүлүкэ таһымнаах буолан, кыттааччылар, тренердэр сыллааҕы үлэлэригэр хайаан даҕаны былааннаан, сыал-сорук туруоран, этэргэ дылы, ох курдук оҥостон, кыайардыы-хотордуу, бэйэни көрдөрөрдүү кэлэллэр.

Онон саҥа ааттар таҕыстылар, сулустар сандаардылар, оттон ким эрэ эккирэтиһэн-эккирэтиһэн, сыалын ситтэ. Саҥа ааттар ортолоругар Дьокуускай куоракка 9 кылааска үөрэнэр Хатас олохтооҕо  Айтал Санников баар. Кини 70 киилэ ыйааһыннаахтарга бастаата.

Айтал аата боксаҕа саҥа иһиллэн эрэр, ол эрээри бу Орто дойду олоҕор (чуолаан спорка) эмискэ, соһуччу диэн суох, син биир хантан эмит,туохтан эмит тардылыктаах, төрүөттээх, ситимнээх. Ол олох чуолкай. Айтал боксаҕа элбэх толкуй, ыараҥнатан, ырыҥалаан көрүү кэнниттэн киирдэ. Ол иннигэр эт-хаан, өй-санаа уопсай сайдыытыгар туһуламмыт дьарыктарга утумнаахтык дьарыктанан кэккэ ситиһиилэрдээх. Ол курдук, кин — 2021 с. оҕолорго скакалкаҕа өрөспүүбүлүкэ чөмпүйүөнэ,  тутум эргииргэ өрөспүүбүлүкэҕэ 5 миэстэлээх, тус рекорда 56 эргиир, Хатас оскуолатын ыһыаҕар "Өбүгэ оонньууларын" 2022 с. кыайыылааҕа, Хатас нэһилиэгин ыһыаҕын "Өбүгэ оонньууларын" 2022 с. кыайыылааҕа, итиэннэ "Лайки Якутии" 2022 с. өрөспүүбүлүкэ таһымнаах улахан күрэххэ бэйэтин ытын Бэлэҕи кытары былырыын 2 миэстэ буолбуттара

Бу кыайыыларга, ситиһиилэргэ Айтал дьиэ-кэргэнин өйөөһүнүнэн, өйдөөһүнүнэн, көмөтүнэн кэлбитэ. Төрөппүттэрэ кини дьарыктанарыгар бары усулуобуйаны олохтообуттара, баҕалаах, тулуурдаах-дьулуурдаах буоллахха, ситиһии син биир хаһан эрэ кэлэр диэн өйдөбүлү кытаанахтык иҥэрбиттэрэ. Ити курдук Айтал аҕатынаан тобулан ылыммыт суолу эккэ-хааҥҥа иҥэринэн, өйгө-санааҕа дириҥник киллэрэн, кыаллыбаты быһааран, чинчийэн өйдөнүү, санааланыы диэн таһымҥа киирэн, инникини-кэнникини быстыбат ситимнээн, тургутунан толкуйдааһын, тэҥнээн көрөн табатык быһаарыныы диэни ааспыттара. Өйү-санааны сааһылааһын, төрүөтүн булуу, тиһэҕэр тиэрдии, дириҥ толкуй, киэҥ көҕүс сатабылга тиэрдэр. Инньэ гынан Айтал күн бүгүн сатабылга үктэнэн турар.

Бу буолбут күрэххэ кими кыайбытын сырдатан ааһар буоллахха, Айтал тренеринээн Валь Михаил Георгиевичтыын киирсиилэрин сөпкө былааннаан, өйдүүн-санаалыын бэлэмнэнэн, ордук сытыы киирсиилэр өрөспүүбүлүкэ 2021, 2022 сыллааҕы чѳмпүйүѳннэрин, Уhук Илин призердарын, олимпийскай резервэ училищетын иитиллээччилэрин  Евгений Саввиновы, уонна Мирнэйтэн Данил Сафоновы (иккиэн 1 спортивнай разрядтаахтар) кыайталаата.

Чэ, боростуойдук эттэххэ, бу ааттаммыт уолаттар 35-40 киирсиилээхтэр,онтон Айтал 8 киирсиилээх. Бу иннигэр тохсунньу ыйга ѳрѳспүүбүлүкэтээҕи турнирга эмиэ маннык таһымнаах спортсменнары кытта киирсиигэ Ленскэйтэн СӨ 3 төгүллээх, Дальнай Восток призера, Бүтүн Арассыыйатааҕы турнир чѳмпүйүѳнүн утары тэҥ киирсиигэ судьуйалар быһаарыыларынан иккис миэстэ буолбута.

 Ол  түгэн кини кыайыыга баҕатын самнарбатаҕа, төттөрүтүн өссө сытыырхатан биэрбитэ. Бу күрэхтэһиигэ кыайыыта кини тохсунньутааҕы күрэххэ  эмискэ, соһуччу киирэн кэлбэтэҕин уонна ааттаах-суоллаах диэн саллыбакка, сабырыйтарбакка, туйгун диэн толлубакка, дьиҥ-чахчы, субу түгэҥҥэ баарынан, кыаҕынан кыттыбытын дакаастаата.  Дьэ, ити курдук Айтал Санников улахан ситиһиилэннэ уонна кулун тутар ый бүтүүтэ Уhун Илиҥҥэ бастыыр иһин күрэххэ өрөспүүбүлүкэ аатыттан барар буолла. Онно кыайбыттар Арассыыйа чөмпүйэнээтин финальнай киирсиилэригэр путевка ылаллар.

Сахалыы сэмэйдик ситиһиитэ баҕарыаҕыҥ уонна сэмээр кэтэһиэҕиҥ. Айтал үс оҕолоох Екатерина, Любомир Санниковтар дьиэ кэргэттэрин улахан оҕолоро буолар. Онон быраатыгар, балтыгар холобур буолар дьоһун, хоһуун киһи.