Манчаары оонньууларын ыытарга 6 улуус сайаапка биэрбитэ: Таатта, Сунтаар, Ньурба, Алдан, Нерюнгри, Кэбээйи.
Кэллиэгийэ чилиэннэригэр кистэлэҥ куоластааһын буолла. Ол түмүгүнэн Тааттаҕа 12 куолас бэриллэн, саха национальнай көрүҥнэрин XII Спартакиада Ытык Күөлгэ ыытыллар буолла. Ньурбаҕа -- 5, Кэбээйигэ уонна Алдаҥҥа – 1. Оттон Сунтаарга ким да куоластаабатах. Нерюнгри кыттыбатын туһунан иһитиннэрэн туораата.
Тааттаҕа Спартакиада 1999 сыллаахха ыытыллыбыта. Оччолорго Олоҥхо оонньуулара диэн ааттана сылдьыбыта. Үйэлэр кирбиилэрэ, кириисис, үп-ас суох кэмэ буолан, улахан спортивнай тутуулар барбатахтара. Онон Таатта дьоно бу сонуну уруйдуу ылынна, үөрэ иһиттэ.
Саха литературатын биһигинэн буолбут Таатта сирэ былыр-былыргыттан быыппастар былчыҥнаах күүстээх бөҕөстөрүнэн, кыырайа кылыйар кытыгырас кылыыһыттарынан, сымса-быһый сүүрүктэринэн аатырар. Ол курдук, биир дойдулаахтара киэн тутта ааттыыллар көҥүл тустууга юниордарга аан дойдуга сахалартан бастакынан чөмпүйүөннээбит Илларион Федосеевы, бастакы маастардар Владимир Андросовы, Иван Аянитовы, П.Д. Каратаевы, И.И. Кулачиковы, А.Г. Макаровы уо.д.а. Саахымат оонньуутугар тэҥнээхтэрин булбатах бырааттыы Афанасьевтар, Мэндэ Таппыров, Зоя Саввина уо.д.а. Атах оонньууларыгар Евгений Иванову, Саха сирин билиҥҥи эрэлэ Данил Андросовы уо.д.а. Доруобуйаларынан хааччахтаахтарга: пауэрлифтиҥҥа Иван Бабанов, кини төрөппүт кыыһа Екатерина Бабанова, дуобакка Сайыына Юнчанова ааттара Бүтүн Арассыыйаҕа сураҕырар. Спортиҥҥа сахалартан бастакынан Арассыыйа спордун маастарынан Айаал Макаров буолбута. Ньургун Сабарайкин -- теннискэ РФ спордун маастара. Игнатий Андросов -- көҥүл тустууга Арассыыйа спордун маастара, хапсаҕайга СӨ спордун маастара, хапсаҕайга уонна грэпплинг көрүҥэр өрөспүүбүлүкэ муҥутуур чөмпүйүөнэ, самбоҕа Бүтүн Арассыыйатааҕы турнир призера, панкратиоҥҥа норуоттар икки ардыларынааҕы күрэхтэһиилэр кыайыылааҕа. Уонна да аттыттары киһи киэн тутта ааттыыр.
Дьэ, онон биэс сыл күүскэ бэлэмнэнэн, Манчаары оонньууларын таатталар үрдүк таһымҥа ыытыахтара диэн бигэ эрэллээхпит.
- 0
- 0
- 0
- 0
- 0
- 0