Олунньу 6 күнэ, бээтинсэ

12:00-15:00 .Мандаат хамыыһыйата.

15:00 — Хамаандалар бэрэстэбиитэллэрин мунньаҕа-сэминээрэ

15:30 — Ыйааһыннааһын (Эр дьон)

18:00-21:00. Ыйааһыннааһын (Бэтэрээннэр)

Олунньу 7 күнэ, субуота

Эр дьон: 85 киилэ, 95 киилэ, 95 килэттэн үөһээ, бэтэрээннэр: 80 киилэ, 90 киилэ уонна 90 үөһээ киилэ.

9:00 — Барыллаан хапсыһыылар.

13:00-14:00 Эбиэт.

14:00-18:00 Барыллаан хапсыһыылар.

18:00 — Үөрүүлээхтик аһыллыы.

19:00 — Финал хапсыһыылара.

20:00 — Абсолютнай бастыыр иһин киирсиилэр 75 киилэттэн үөһээ.

Олунньу 8 күнэ, өрөбүл.

Эр дьон: 57 киилэ, 65 киилэ, 75 киилэ, бэтэрээннэр: 60 киилэ, 70 киилэ.

9:00 — Барыллаан уонна полуфинал хапсыһыылара.

17:00 — Полуфинал уонна финал хапсыһыылара.

18:00 — Абсолютай бастыыр иһин киирсиилэр 75 киилэҕэ диэри.

Тэрийэр кэмитиэт.

Хапсаҕай турнирын көрөбүт

 «Саха» НКИК теле-ханаала

Олунньу 7 күнэ — 15:00-21:00

Олунньу 8 күнэ — 15:00-21:00

Хаҥаластар төрүттүүр түһүлгэлэрэ

«Хаҥалас хапсаҕайа» норуоттар  икки ардыларынааҕы күөн күрэс көбүөрэ Дьокуускайга иккис төгүлүн тэлгэннэ. Бүгүн сарсыарда 9 чаастан саҕалаан икки күн устата 500-тэн тахса бөҕөс ким бэрдин быһаарсыахтара.

Бу бөдөҥ тэрээһиҥҥэ анаммыт пресс-кэмпириэнсийэҕэ физкультура уонна спорт миниистирэ Леонид Спиридонов саха омук тустуута Аан дойдутааҕы көс омуктар оонньууларын тосхолугар киирбитин иһитиннэрэн туран: «Бу түһүлгэни тэрийээччинэн Хаҥалас улууһун дьаһалтата, ону сэргэ Хапсаҕай норуоттар икки ардыларынааҕы федерацията буолаллар, биһиги өйүүбүт, көмөлөһөбүт», — диэн бэлиэтээтэ.

Хапсаҕай норуоттар икки ардыларынааҕы федерациятын бэрэсидьиэнэ Вячеслав Нестеров кэпсээбитинэн, бу сырыыга омук дойдуларыттан итиэннэ атын эрэгийиэннэртэн  сүүсчэкэ бөҕөс кыттыыны ылыаҕа. Ону таһынан, быйыл хапсаҕайга Арассыыйа чөмпүйүөнээтэ уонна хамаанданан дойду Кубога ыытыллара былааннанарын иһитиннэрдэ.

Тус бэйэм икки ыйытыыбар маннык хоруйдары ыллым:

— Бу күрэхтэһии урукку өттүгэр Покровскайга ыытыллара, олохтоохтор суохтаабыттар, күүтэр-кэтэһэр түһүлгэбит этэ дииллэр. Улууспутугар «Хаҥалас хапсаҕайа», эбэтэр атын турнир ыытыллара буоллар диэн баҕалаахтар.

Хаҥалас улууһун баһылыга Сергей Гребнев: «Кырдьык, бу турнир Покровскайтан саҕаламмыта, сыл ахсын ыытыллара, дьон сөбүлүүрэ, көһүтэрэ. «Хаҥалас хапсаҕайа» үрдүк таһымҥа таҕыста, биһиэхэ бачча улахан тэрээһини ыытар дьиэбит-уоппут суох. Сотору улууска Манчаары оонньууларыгар аналлаах улахан тутуулар дьэндэйиэхтэрэ. Дьэ оччоҕуна аан дойдутааҕы күрэхтэһиини тэрийиэхпит дии саныыбын», — диэн хоруйдаата.

Ону таһынан кэлбит ыалдьыттартан бэйэлэригэр хапсаҕайга күрэхтэһиилэри ыыталларын ыйыппыппар, Индийэ бэрэстэбиитэлэ икки сыл тэрийбиттэрин эттэ, быйыл 200-тэн тахса киһи күрэстэспит эбит. Узбекистаан бэрэстэбиитэлэ сэһэргээбитинэн, кинилэр бэйэлэрин «уч кураш» диэн тустууларыгар чөмүйэнээттэригэр, хапсаҕайга икки-үс ыйааһыҥҥа тустууну киллэрэллэр эбит.

Дьэ ити курдук, сахабыт хапсаҕайа эйгэтин сыыйа кэҥэтэн иһэр.

Гаврил СТРУЧКОВ.

Ааптар хаартыскаҕа түһэриилэрэ.