Нэһилиэнньэ итэҕэлин ылбыт дьоммут бастакы тэрээһиннээх мунньахтара балаҕан ыйын 29 күнүгэр нэһилиэк сынньалаҥын тэрийэр «Иэйии» киин саҥа уораҕайын иккис мэндиэмэнин саалатыгар буолан ааста. Бэбиэскэҕэ 14 сүрүн боппуруос киирдэ. Мунньаҕы, ытыктабыл быһыытынан, дьокутааттартан аҕам саастаахтара, биир дойдулаахпыт Екатерина Семеновна Никитина саҕалаата.
Кини иккис төгүлүн нэһилиэнньэ итэҕэлин ылан талыллыбыт баһылык Николай Николаевич Карамзиҥҥа эҕэрдэ тылын тириэртэ. Алтаннааҕы 58 нүөмэрдээх учаастактааҕы быыбардыыр хамыыһыйа бэрэссэдээтэлэ саҥа талыллыбыт сололоохторго быыбар түмүктэрин иһитиннэрдэ, дастабырыанньаларын туттарда уонна дьаһалтаны, нэһилиэнньэни кытары ыкса сибээстээх үлэлэригэр ситиһиилэри баҕарда. Регламент быһыытынан дьокутааттар Сэбиэттэрин бэрэссэдээтэлин солбуйааччытын, сэкирэтээрин, бастайааннай хамыыһыйалары таллылар. Мунньах чэрчитинэн коллегиальнай уорган тэрилиннэ. Учаастактааҕы быыбардыыр хамыыһыйа быһаарыыларын куоластааһын түмүгүнэн ылынан, баһылыгы уонна дьокутааттары бигэргэттилэр. Салгыы нэһилиэк баһылыга Николай Карамзин бу сылга түмүктэнэр үлэлэри, нэһилиэк бүддьүөтэ туолуутун, чуолкайданыытын, олохтоох дьаһалтаҕа каадыр боппуруоһун туһунан, инники былааннарын билиһиннэрдэ.
Сокуон уларыйыытын ымпыгын-чымпыгын чугастык чахчы билбит, сокуоннары таһаарыыга быһаччы үлэлэспит, өр сылларга Дьокуускай куорат Мунньаҕар, Саха Өрөспүүбүлүкэтин уонна федеральнай парламеннарга дьокутааттаабыт баай уопуттаах биир дойдулаахпыт Екатерина Семеновна «Публичнай былаас ситимигэр олохтоох бэйэни салайыныы уопсай бириинсиптэрин туһунан» саҥа сокуон тула сэһэргэһиини ыытта, хайдах быһыылаахтык дьаһанарга этиилэри киллэрдэ.
Мустубут дьон Екатерина Семеновна хас биирдии тылын, этиитин бары болҕойон иһиттилэр, уһун кэмҥэ сокуону кытары «эн-мин» дэһэн үлэлэспит киһи билиититтэн-көрүүтүттэн иҥэриннилэр. Үүнүөхтээх саҥа сылга нэһилиэнньэни кытары уопсай сүбэнэн сыллааҕы былаан ылыныахтарын бигэргэттилэр. Уоппуттаах киһи хайа да түгэҥҥэ эппиэттээх, сыһыарыллыбыт дьоннор уонна былааннар баар буоллахтарына эрэ ирдэһэргэ, туруулаһарга кыах, үлэ-хамнас таһаарыылаах буоларыгар эрэл баар буоларын чиҥэтэн эттэ. Инникитин олохтоох бэйэни салайыныы үлэтэ-хамнаһа аһаҕастык барарын, ыытылларын ситиһэр сыалтан, бэрэстэбиитэллээх уорган мунньахтара нэһилиэнньэни хабан аһаҕастык ыытыыллыахтарын наадата чопчуланна. Мунньах бэбиэскэ торумнарынан бэрт чопчутук ыытыллан, дириҥ ис хоһоонноох кэмҥэ, сокуон уларыйаары турар быыһык бириэмэтигэр талыллыбыт дьон итэҕэллээхтэрин уопсай хаартыскаҕа түһүүлэринэн түмүктэннэ.
Татьяна АТЛАСОВА
Хаартыскалар Амма олоҕо
-
2
-
0
-
0
-
0
-
0
-
0
