Чуумпуран турбут аар тайҕа сөрүүкэтэр аналлаах чээл күөҕү бүрүнүө, төрүүр-ууһуур, үөскүүр аналлааҕын хонноҕун анныгар хоннорон, быттыгын быыһыгар кистээн, сай устата тото-хана аһатан-сиэтэн улаатыннара охсон кырыа кыһын кыһарҕаныгар бэлэмниэ. Аҥаат-муҥаат алаастарга, хоодуот хоһуун хонууларга, сырсар- күрсэр сыһыыларга ас амтаннааҕа баарын билэр ураа муостаах мустуо, сыспай сиэллээх сыбыытыа.
Отчут-масчыт ох курдук оҥостуо, эрдэттэн бэлэмнэниэ, наадалаах диэбитин наардыа, сөптөөх диэбитин сааһылыа, бэрт буолуо диэбитин бэлиэтии көрөн бэрийиэ. Ыралаах олохпут ырыа курдук ылбаҕай, хоһоон курдук хомоҕой, сэһэн курдук сэргэх, кэпсээн курдук кэрэ буоларын туһугар улуус улуус аайы улуулар мустан, оройуон оройуон аайы чулуулар түмсэн, үөскүөхтэриттэн үтүөҕэ, айыллыахтарыттан сырдыкка анаммыт, төрөөбүт төрүт тылбыт сөлөгөйүн иҥэриммит, өркөн өйдөөх, мааны майгылаах сир түннүгэ дьоммут арчылыыр,араҥаччылыыр ылыннарыылаах тылларын- өстөрүн, өтө көрүүлээх этиилэрин эккэ-сииҥҥэ иҥэринэр, түүлээх холбукаҕа хатыыр кэрэ кэммит- Бэс ыйа!
Хаһаастаах буоларга хардыылары, хамсаныылары оҥорор, уурунуулаах буоларга туругуран туран турар- олорор, түбүгүрэр ыйбыт - бэс Ыйа! Оҕо дьоммут оттомуран туран тургутуулары ааһар, иһийэн олорон дьоһуннаахтык толкуйдаан билиилэрин көрдөрөр долгутуулаах кэмнэрэ - бэс ыйа! Этэҥҥэ буолуохха, саҥа күнүнэн сэгэрдээр!
Хаартыска эрэдээксийэ архыыбыттан.
-
0
-
0
-
0
-
0
-
0
-
0
