СӨ Бырабыыталыстыбатын бэрэстэбиитэллэрэ, инновацияҕа, сыыппара сайдыытыгар уонна инфокоммуникационнай технологияларга министиэристибэтин, «Якутия» технопарк үлэһиттэрэ, араас үнүстүтүүттэр дуоктардара кыттыылаах мунньахха Саха Сиригэр инновация сайдыытын, ситиһиилэрин уонна инники тосхоллорун ырыттылар. Арассыыйа инновацияҕа бэрэстэбиитэллэрэ, «Сколково» уонна «Восход» пуонда сүрүн исписэлиистэрэ телемост нөҥүө холбонон эҕэрдэ тылларын тириэртилэр.
– СӨ Ил Дархана ааспыт сыл сэтинньи 13 күнүгэр Инновация күнүн олохтообута. Бу күн өрөспүүбүлүкэбит Бастакы Бэрэсидьиэнэ Михаил Ефимович Николаев аатын кытары ыкса сыһыаннаах. Бу – кини төрөөбүт күнэ. Сахабыт Сирэ сайдыытыгар улахан кылааттаах сүдү киһибит Михаил Ефимович аатын үлэбитинэн, сайдыыбытынан, аныгы технологиялары үлэҕэ киллэриибитинэн үйэтитэбит, улахан махталбытын биллэрэбит. Михаил Ефимович киһи хапытаала сайдарыгар, үөрэҕириигэ, билимҥэ уонна инновацияҕа ураты болҕомтолоох этэ, – диэн СӨ Бырабыыталыстыбатын бэрэссэдээтэлин солбуйааччыта Анатолий Семенов эттэ.
СӨ Инновацияҕа, сыыппара сайдыытыгар уонна инфокоммуникационнай технологияларга миниистирэ Василий Ефимов билими, бырабыыталыстыбаны уонна улахан корпорациялары сомоҕолоһон үлэлииргэ, Сахабыт Сирин экэниэмикэтин сайыннарарга ыҥырда. Инновациялары сайыннарар пуонда, Саха Сирин IT-паарката уонна «Алроса» хампаанна ардыларыгар табыгастаах, холобур буолар сыһыаннаһыыны сырдатта.
Мунньахха иһитиннэрбиттэринэн, бүтэһик уон сылга «Якутия» технопарк, IT-парк, инновациялары сайыннарыы пуондата, оройуоннарга IT-кииннэр арылыннылар, интэриниэт ситимэ оройуоннарга барыларыгар тиийдэ, инновационнай хампаанньалар ахсааннара уонна сыллааҕы дохуоттара үрдүүр. Холобур, «Якутия» технопарк 159 резидена 2022 сылга 1,95 млрд. солк. дохуоттаммыттар. Олор истэригэр «Suuyar» бренд бытовой химияны оҥорор, антитепловизорнай хаачыстыбалаах бэргэһэлэри тигэр «Куттала суох Аартыка» ХЭТ, пилота суох көтөр аппарааттары таҥар «Саха дрон» ХЭТ, антитепловизорнай балааккалары, тиэхиньикэ бүрүөһүннэрин оҥорор «Хоту тент», о.д.а.
Маны тэҥэ, Саха Сирин IT-пааркатын 103 резидена 2022 сылга 1 млрд солк. дохуоттаммыт. IT-кииннэр өрөспүүбүлүкэ араас муннуктарыгар: Сунтаарга, Намҥа, Орто Халымаҕа, Ньурбаҕа, Бороҕоҥҥо, Бэрдьигэстээххэ, Баатаҕайга, Өлөөҥҥө, Аммаҕа, Покровскайга, Мииринэйгэ, Кэбээйигэ, Чурапчыга, Мукучуга, Ытык Күөлгэ, Аллараа Бэстээххэ, Алдаҥҥа, Тиксиигэ, Өлүөхүмэҕэ, маны тэҥэ Донецкай Норуодунай өрөспүүбүлүкэ Кировскай куоратыгар арылыннылар.
«Б8 акселератор» нөҥүө 2019 сылтан 10 поток үлэлээн 129 бырайыак көрүллүбүт, олортон 52-тэ үбүлэммит. Бырайыактарга инвестициялар уопсай сууммалара 87,1 мөл.солк. тэҥнэспит.
Үөрүүлээх тэрээһиҥҥэ Леонид Владимиров (биотехнологияҕа уонна физиология эйгэтигэр Арассыыйа учуонайа, зоотехник, РАН чилиэн-кэрэспэдьиэнэ), Максим Ким («Саха Сирин технопарката» ГАУ салайааччыта), Алексей Комаренко («Якутия» венчурнай хампаанньа АУо генеральнай дириэктэрин э.т.) о.д.а. тыл эттилэр. Мунньахха ситиһиилэри сэргэ инникигэ былааннары торумнаатылар. Ол курдук, СӨ Үөрэххэ уонна наукаҕа министиэристибэтиттэн талааннаах оҕолору, каадырдары өйүүргэ анал истипиэндийэлэри олохтуурга этии киирдэ.
Инновацияҕа кылааттарын иһин алта исписэлиис махтал суруктарынан бэлиэтэннилэр. Маны тэҥэ «Саха Сирин Инновацияҕа туйгуна» түөскэ кэтиллэр бэлиэнэн СӨ инновацияны сайыннарыы пуондатын партнердаһыы уонна акселерационнай бырагыраамаларга управлениетын начаалынньыгын Савина Алексееваны, пилота суох көтөр аппарааттар оператордарын бэлэмниир уонна идэҕэ бэлэмнээһин ыстаабын инструкторын Алексей Ягловскайы, «Дьиэтээҕи уонна ойуур үүнэйилэрин микроклоннааһын» бырайыак салайааччытын, ХИФУ мэдиссиинэ үнүстүтүүтүн доценын Александра Попованы наҕараадалаатылар.
-
0
-
0
-
0
-
0
-
0
-
0
