Ытык кинигэҕэ, Библияҕа сурулларынан, Мария кэргэнин Иосибы кытта Вифлеем куоракка нэһилиэнньэ ахсаанын ааҕалларыгар кытта кэлбиттэр. Хонор сирдэрэ суох буолан, бостууктар кинилэри барааннары, хороҕор муостааҕы тутар пещераларыгар киллэрбиттэр. Ыкса түүн Иисус Христос манна күн сирин көрөр. Ол күн Ирод ыраахтааҕы кинини солбуйар киһи төрөөбүтүн билэн, былааһын былдьатартан куттанан, саҥа төрөөбүт оҕолору барыларын сырдык тыыннарын быстарар.
Тохсунньу 7 күнэ Саҥа Дьыл курдук көннөрү бырааһынньык буолбатах, итэҕэйэр дьон Ороһооспоҕо анаммыт Евангелиены (Матфейтан бастакы, иккис салааны, Лукаттан иккис салааны) ааҕыахтаахтар.
Бу күн дьон Таҥара дьиэтигэр сылдьар, онтон бырааһынньыктааҕы остуолу тардан, ыалдьыттары ыҥырар. Ороһооспо иннинэ дьиэлээхтэр баанньыкка сууналлар, дьиэлэрин хомуналлар, саҥа таҥас кэтэллэр, ыраас ыскаатар тэлгииллэр. Оччотугар сыл ситиһиилээх, өлгөм үүнүүлээх буолар диэн этэллэр.
Ороһооспоттон Кириһиэнньэҕэ диэри үлэнэн дьарыктанар, иистэнэр, баайар бобуллар. Тохсунньу 7 күнүгэр дьиэни сууйуллубат, кирдээх, эргэ таҥаһы кэттэххэ сыл бөрүкүтэ суох буолар дииллэрэ.
Эр дьон Ороһооспоҕо бултаабаттар, балыктаабаттар. Ону таһынан, дьону кытта этиһиллибэт, остуолга олорон айдаарар эмиэ көҥүллэммэт. Кыаммат дьоҥҥо көмөлөһөр, бырааһынньыктааҕы остуолга ыҥырар үтүө үгэс баар.
Таҥара дьиэтэ Ороһооспоҕо сэрэбиэйдиири сөбүлээбэт, онон хараҥа күүстэри ыҥырар бобуллар.
Дьон эрэ барыта Ороһооспону үөрэ-көтө көрсөр кыаҕа суоҕун өйдөөн туран, тулаайах оҕолорго, соҕотох хаалбыт кырдьаҕастарга бэлэх оҥорор, үтүө тыллары этэр, санааларын көтөҕөр тоҕоостоох. Бэлэх булгуччу сыаналаах буолуохтаах диэн буолбатах, киһиэхэ болҕомто эрэ наада.
Таҥара дьиэтигэр саҥа таҥас-сап, туттар тэрил, буортуйбат ас илдьэн биэрдэххэ, олохторугар уустук балаһыанньаҕа түбэспит дьоҥҥо түҥэтэллэр.
Ороһооспоҕо анаммыт Таҥараҕа сулууспа тохсунньу 6 түүнүгэр саҕаланар, онтон тохсунньу 7 күнүгэр сарсыарда 10 ч. салҕанар. Итэҕэйэр дьон чүмэчи ууран, малыыппа ааҕаллар, саамай сүрүнэ, Таҥараҕа куруук махтана сылдьыахтаахпыт, ол эбэтэр баары барытын кини биэрэр.
Хаартыска: куйаар ситимиттэн
-
0
-
0
-
0
-
0
-
0
-
0
