«Бу саҥа төлөбүрү ийэ хапытаалын эрэ туһаммыт дьон ылар бырааптаахтар. Дьиэ кэргэн ити 5000 солк. ылан туһаныан баҕардаҕына, үс ый иһинэн ылар кыахтаах», - диэн РФ үлэҕэ, социальнай көмүскэлгэ миниистирэ Антон Котяков иһитиннэрбитэ.
Бүгүн бу туһунан Биэнсийэ пуондатын Саха сиринээҕи салаатын сайтыгар эбии иһитиннэрии таҕыста. Ол курдук, Арассыыйатааҕы биэнсийэ пуондатын бырабылыанньатын бэрэссэдээтэлэ Максим Топилин этэринэн, эрэгийиэнннээҕи Биэнсийэ пуондалара хас биирдии дьиэ кэргэҥҥэ посуобуйа харчытын туһаныахтаахтарын туһунан хайаан да иһитиннэриэхтэрэ. Арассыыйа үрдүнэн үстэригэр диэри саастаах оҕолордоох 2,3 мөл. дьиэ кэргэн бу көмөнү ылыахтааҕа биллэр. Саха сирин үрдүнэн үһүгэр диэри саастаах 34 тыh. кэриҥэ оҕо төрөппүттэригэр 5000-лыы солк. төлөнүөҕэ. Тоhоҕолоон эттэххэ, сэртипикээттээх дьиэ кэргэттэр алтынньы 1 күнүгэр диэри өйөбүлү ылар туhунан сайабылыанньаларын биэриэхтэрин сөп. Сэртипикээттэн ураты ханнык да докумуон ирдэниллибэт. Наада да буоллаҕына, Биэнсийэ пуондата бэйэтэ тустаах уорганнартан ыйытыаҕа.
Посуобуйа уопсай суумата
Икки оҕолоох дьиэ кэргэн маҥнайгы оҕолоро икки саастаах, кыралара 2020 сыл тохсунньутугар төрөөбүт буоллаҕына, сайабылыанньаларын муус устарга биэрдэхтэринэ, дьиэ кэргэҥҥэ муус устар ыйтан саҕалаан бэс ыйыгар диэри ый аайы 10000 солк. төлөнөр. Ол аата үс ый устата 30000 солк. Онтон итинник састааптаах дьиэ кэргэн сайабылыанньаларын 2020 сыл балаҕан ыйыгар биэрдэхтэринэ, 30000 солк. толору биирдэ ылаллар.
Үс оҕолоох дьиэ кэргэҥҥэ кыралара 2020 сыл тохсунньутугар төрөөбүт, онтон улахан оҕолоро 2020 сыл ыам ыйыгар 3 сааhын туолар буоллаҕына, сайабылыанньаларын муус устарга биэрдэхтэринэ, муус устарга уонна ыам ыйыгар дьиэ кэргэн 15000-тии солк. ылар (хас биирдии оҕолоругар 5000-лыы солк.). Онтон бэс ыйыгар 3 саастарын туола илик икки кыра оҕолоругар холбоон, 10000 солк. төлөнөр. Ол аата үс ый устата 40000 солк. ылаллар. Онтон дьиэ кэргэн соҕотох оҕолоро 2020 сыл ыам ыйыгар төрөөбүт буоллаҕына, сайабылыанньаларын атырдьах ыйыгар биэрдэхтэринэ, дьиэ кэргэн ыам уонна бэс ыйдары холбоон, 10000 солк. ылар.
Сайабылыанньаны биэрии
Ити төлөбүрү ылыан баҕалаах төрөппүт pfrf.ru диэн РФ Биэнсийэтин пуондатын сайтыгар уонна gosuslugi.ru. диэн өҥөнү оҥорор порталга тус кэбиниэккэ киирэн, сайабылыанньа суруйар. Сайабылыанньалары Биэнсийэ пуондатын территориальнай уорганнарыгар, килийиэннэри кытары үлэлиир анал сулууспаларга эмиэ биэриэххэ сөп. Онуоха коронавирус дьаҥа тарҕаныытын утарар дьаhаллар чэрчилэринэн, Биэнсийэ пуондатын бары оройуоннааҕы уонна Дьокуускай куораттааҕы управлениеларга (килийиэннэри кытары үлэлиир сулууспаларга) эрдэттэн суруттарыахха наада. Эрдэттэн суруттарыы Биэнсийэ пуондатын сайтыгар уонна мобильнай сыhыарыытын нөҥүө ыытыллар. Итини тэҥэ, Арассыыйа Биэнсийэҕэ пуондатын Саха сиринээҕи салаатын биир кэлим элбэх ханааллаах төлөпүөнүн ситимин 8-800-100-99-74 нүөмэригэр эрийэн билсиҥ. Дьокуускай куорат уонна Жатай олохтоохторо Арассыыйа Биэнсийэҕэ пуондатын Дьокуускай куораттааҕы управлениетын 8(4112)34-21-31 нүөмэригэр эрийэргитин күүтэллэр. Оройуоннарга баар Биэнсийэ пуондатын управлениеларын суhал лиинийэлэрин нүөмэрдэрин Пенсионный фонд Российской Федерации диэҥҥэ киирэн эмиэ булуоххутун сөп.
-
0
-
0
-
0
-
0
-
0
-
0
