Биэрэк уҥуор көрөр тумускутугар Өксөкүлээх, Алампа, Ойуунускай, Суорун Омоллоон, Амма Аччыгыйа, Дьуон Дьаҥылы курдук улуу дьохсоҕоттор төрүттэрэ буолбут Кээрэкээн Ойуун көмүллэ сытар дииллэр. Кини өлөрүгэр: "Куоҕас буолан сытарбын булбут сиргитигэр көмтөххүтүнэ, онтон харыйа үүнүө. Онно эдэр кыыс кэлэн олордоҕуна, үөн буолан киниэхэ киириэм. Оччоҕо иккистээн төрүөм", -- диэбитэ үһүйээҥҥэ кэпсэнэр. Кырдьыга, ити миэстэҕэ соҕотох харыйа турбут үһү. Онтон мотуок уута илдьэ баран дуу, бэйэтэ сууллан дуу, билигин суох буолбут.
Уҥуоргу хайа ураты харыстанар сирэ итинник умайа турарын көрөргө хараастыылаах...
Өрөспүүбүлүкэҕэ биллэр фермер, 90-с сыллартан турбазалаах урбаанньыт, хоһоонньут бэрдэ Данил Афанасьев хаарыан хайаларын күөх маһын куруҥҥа кубулутар кыһыл уоту умуорар алгыһы үрдүкү Айыылартан көрдөһөн түһэрэр.
Саха сиригэр биир бастакынан туризмы саҕалаабыт 75 саастаах Баһылай Атласов Чычымах сиригэр "Өксөкүлээх түһүлгэтэ" диэн туркомплексы соҕотоҕун оҥоро сылдьар.
Суохтан баары оҥорор Баһылай Атласов, үөт маһы маннык араастаан быһыылаан кырыйан, тиэргэнин киэргэтэр.
Суох, ити аквариум иһигэр сылдьар киһи буолбатах. Бу -- уу аннынааҕы кафе түннүгэ. Дьон умсарын, балык устарын көрө олорон аһыыгын. Данил Афанасьев "Дьаам" турбазатыгар оҥорбут.
Амма кырдалыгар үүнэр кэрэ сибэкки -- "Мак полярный".
Кытылы кыйа Өксөкүлээх Өлөксөй айымньыларынан маннык арт-объектар аллеялара баар буолуо.
Өксөкүлээх төрөөбүт Уучай алааһын баараҕай суон тиитэ. Бука, суруйааччы үгүстэ бу мас анныгар кэлэн олорбута, ырааҕы анаар санаабыта буолуо...
-
0
-
0
-
0
-
0
-
0
-
0
