Ол эрээри хоноҕор муостаахпыт дьүһүнэ-бодото улуу кытайдар халандаардарынан чуо ойууланан сылдьар эбээт – “белый металлический бык” диэн.
Биһиэхэ “металл” диэни солбуйар тыл суох. Тимир диэн “железо”. Онон уран тыллаахтар араастаан тылбаастаан холоннулар: үрүҥ кыаһаан, тимир солотуулаах, үрүҥ болгуо, килбиэн кудулу, муус килиэ маҥан...
Дьон сэргэ Үрүҥ Болгуо Оҕус диэни биһирээбитинэн, сылбыт бэлиэтин итинник диэххэйиҥ. Дьэ, бу ааттаах атыырбыт кэлэр сылга тугу айаатыыр эбитий?
Оҕус – үлэһит, сымнаҕас, көнө сүнньүлээх кыыл. Соруйан кыынньаабатаххына, хаһан да кэйиэ суоҕа. Онон үүнэр сылга сүрэҕэлдьээбэккэ, күүскэ үлэлиэх тустаахпыт. Оччоҕо хаһаайын карьера кирилиэһин дабайарга көмөлөһүө.
Оттон тимир солотуулааҕа кини кытаанаҕын, модун санаалааҕын, сиргэ бигэтик турарын, эрэллээҕин туоһулуур. Ол иһин ити хаачыстыбатыгар эппиэттэһэр гына дьоһуннаахтык 2021 сылы атаарыахтаахпыт. Дьиэ кыыла буолан, болҕомтону чугас дьоммутугар, төрөппүттэрбитигэр, оҕолорбутугар, аймахтарбытыгар уурарбытын ирдиир.
Дьэ, онон: “Саадьаҕай оҕус, сайгыччы соҕус, айаннаан иһиий, алааспар тиэрдиий. Һай!”, -- диэн ыллыы-ыллыы, Сахабыт сирин хаар-муус оҕустарын көрүөххэйиҥ.
- 0
- 0
- 0
- 0
- 0
- 0