Сэргээ

Сыыртан саарыктар

Састааба: 300 г куурусса этэ, 100 г сыыр, 50 г грецкэй эриэхэ, 3 ост. ньуоска майонез, маслина, укуруоп, чусунуок, туус, биэрэс. Бастаан куурусса этин уонна сымыыттары буһаран баран сойутаҕыт. Онтон буспут куурусса этин эрийэҕит. Сымыыттары уонна сыыры теркаҕа аалаҕыт, күөх үүнээйини уонна чусунуогу бытархай гына кырбыыгыт. Итилэри барытын иһиккэ холбоон баран, үрдүгэр майонез кутан баран булкуйаҕыт. Ити маассаттан төгүрүк саарыктары оҥороҕут, иһигэр маслинаны угаҕыт. Бүтэһиккэ саарыктары бытарытыллыбыт грецкэй эриэхэҕэ төкүнүтэн ылаҕыт. Биир бэртээхэй бүлүүдэ бэлэм буолла! Остуолга нэлэгэр тэриэлкэҕэ уураргытыгар, күөх үүнээйинэн киэргэтэн биэриэххитин сөп.

Кууруссаттан уонна кукурузаттан

Састааба: 200 г куурусса этэ, 100 г кукуруза, 50 г сыыр, 2 сымыыт, маринованнай шампиньоннар, 1 оҕурсу, 2-3 ост. ньуоска майонез, туус, биэрэс. Буспут куурусса этин уонна оҕурсуну солуомалыы быһаҕыт. Сыыры теркалыыгыт уонна кукурузаны кутаҕыт. Сиикэй сымыыттары туустаан-тумалаан баран, үллүөр диэри биилкэнэн булкуйаҕыт. Ол кэнниттэн хобордооххо омлет курдук икки өттүттэн арыыга сыралатан ылаҕыт. Омлеты эмиэ солуомалыы быһаҕыт. Шампиньоннары бытархай гына кырбыыгыт. Дьэ, уонна барытын бииргэ булкуйан, майонезтаан кэбиһэҕит.

Ороһуоспатааҕы венок

Састааба: 250 г ынах этэ, 1 устуука эриэппэ луук, 3 обургу хортуоппуй, 2-3 устуука маринованнай оҕурсу, 2 сымыыт, 1 баайыы укуруоп, майонез. Киэргэтэргэ: укуруоп, гранат, кукуруза, кытаанах сыыр. Бу олус кэрэ көстүүлээх эрээри, судургутук оҥоһуллар салаат. Куурусса да, убаһа да эттэрэ эбэтэр семга да барсар. Бастатан туран, эти, сымыыты уонна хортуоппуйу буһараҕыт. Нэлэгэр тэриэлкэ ортотугар ыстакааны туруораҕыт. Ыстакааны тула маҥнай теркаламмыт хортуоппуйу төгүрүктүү дьапталҕалаан уураҕыт. Ону майонеһынан сотоҕут. Салгыы маннык бэрээдэгинэн баран иһэҕит: куубуктуу кырбаммыт эт, луук, маринованнай оҕурсу, теркаламмыт сымыыт. Икки ардыларын майонезтыыргытын умнумаҥ. Онтон укуруоп сымнаҕас лабааларын бытарыта быһа-быһа, бүлүүдэбитин бүтүннүү күөх үүнээйибитинэн саба бүрүйэн кэбиһэбит. Уонна, дьэ, оргууй сэрэнэн, ыстакааммытын оруубут. Салааппыт бэртээхэй венок быһыылаах буолан тахсар. Аны киэргэтиитигэр киирэбит. Маныаха гранат сиэмэлэрин, кукурузаны, харыйа оонньуурдарын курдук, онон-манан таммалатабыт уонна кытаанах сыыртан сулустары (ким тугу баҕарарынан, сатыырынан) быһан уурабыт. Минньийэрин курдук, эмиэ кыратык туруора түһэбит.

Харыйачаан

Састааба:1 ыстакаан рис, 150 г буспут эт, 2 устуука маринованнай оҕурсу, 70 г моцарелла сыыр, буспут сүбүөкүлэ аҥаара, 2 баайыы күөх луук, баар буоллаҕына петрушка, гранат, майонез. Бу салаакка араас бородуукталары холбуохха сөп. Кылаабынайа, бэйэ-бэйэлэрин кытта барсаллара уонна минньигэс буолаллара наада. Уратыта диэн, Саҥа дьыллааҕы харыйа быһыылаах буолар. Онон салааты ньолбоҕор иһиккэ оҥорор ордук табыгастаах. “Ороһуоспатааҕы венок” курдук, ингредиеннэрэ эмиэ слой-слой дьапталҕалыы ууруллар, быыстарыгар майонез сотуллар. Онон тута сааһыланар бэрээдэгинэн этэбит: бастаан риһи харыйа курдук быһыылаан уураҕыт, онтон кырбаммыт эт, салгыы сүбүөкүлэ, маринованнай оҕурсу, ол үрдүнэн теркаламмыт моцарелла сыыр (атын да көрүҥ барсар), үрдүгэр күөх луук, петрушка. Салааппыт, чахчы, харыйа курдук көстөр буолар. Гранат сиэмэлэринэн харыйабытын киэргэтэбит.

Дьаабылыкалаах куурусса

Састааба: куурусса этэ, 2 аһыы дьаабылыка, 2 ост. ньуоска кууруссаҕа аналлаах тума, 60 г ынах арыыта, чусунуок 4 өлүүтэ, розмарин 1салаата. Бытарытыллыбыт чусунуогу, кырбаммыт розмарины, тууһу-туманы уулларыллыбыт ынах арыытын кытта булкуйаҕыт. Ити сүмэһининэн кууруссаны ис-тас өттүттэн сыбаан сотоҕут уонна 2 чаас кэриҥэ туруораҕыт. Онтон бысталаммыт дьаабылыканы куурусса иһигэр симэн баран, тигэҕит эбэтэр тиис ыраастыыр маһынан туттараҕыт. Духуопкаҕытын 180 кыраадыска холбоон баран, 2 чаас устата буһараҕыт.