Сэргээ

Өрөспүүбүлүкэ бары куораттарыгар утарсааччыларынан хабылыннылар. Ити да буоллар, миитиннэр сүрүн ирдэбиллэрэ толоруллубутун да үрдүнэн: өрөспүүбүлүкэ бырабыыталыстыбата отставкаҕа ыытыллынна, өрөспүүбүлүкэ куттал суох буолуутун Сэбиэтин бэрэссэдээтэлин дуоһунаһыттан Нурсултан Назарбаев уурайда, оттон уматык сыаната намтаабыта. Ол да буоллар утарсааччылар бэрэсидьиэн, уо.д.а. бырабыыталыстыба дьаһалтатын эбийиэктэрин күүстэринэн тутан ылбыттар.  Полиция уонна байыаннайдар миитиҥҥэ тахсыбыт дьону кытта тэҥник утарсааччылар диэки буоллулар. Сорох нэһилиэнньэлээх пууннарга сибээс суох, билигин Арассыыйа үгүс дьоно бэйэлэрин аймахтарын кытта сибээстэһэр кыахтара суох.

Казахстаҥҥа бырачыастар туохтан саҕаламмыттарай?

Тохсунньу 2 күнүгэр Казахстан хас да куоратын олохтоохторо тырааныспар уматыгын сыанатын эмискэ үрдээһинин утары уулуссаҕа тахсыбыттара. Өрөспүүбүлүкэҕэ саҥа сылтан тырааныспарга уматыллыбыт гаас лиитэрэтигэр 60-тан 120 тенге диэри (10-тан 20 солк. диэри) үрдэппиттэрэ. Сотору кэминэн бырачыас ирдэбиллэригэр бырабыыталыстыбаны отставкаҕа ыытарга, саҥа быыбары тэрийии, урукку бэрэсидьиэн Нурсултан Назарбаев "кланын" дьону былаастан туоратарга этиниллибиттэрэ.

Тохсунньу 4 күнүгэр Алма-Атаҕа уонна да атын куораттарга полицияны уонна байыаннайдары  утары охсуһуу саҕаламмыта. Актобеҕа, Таразеҕа, Актауга уо.д.а. нэһилиэнньэлээх пууннарга утарсааччылар баар буолбуттара. Ол эрээри уустук быһыы-майгы ордук Алма-Атаҕа хото сайдыбыта.

Казахстаан куораттарыгар билигин туох буола турарый?

Казахстаан Бэрэсидьиэнин резиденциятын утарсааччылар туттулар. Сорох СМИ иһитиннэрэринэн, онно баһаар турбута. Атын СМИ-лэр судаарыстыба баһылыгын резиденциятыгар буолбакка, дьаһалта дьиэтигэр диэн суруйаллар. Куоракка борокуратуура уонна оройуоннааҕы отдел дьиэтэ умайда. Утарсааччылар полиция департаменын дьиэтин тутан олороллор.  Митиини тэрийээччилэр полицияттан уонна байыннайдартан дубинкаларын уонна щиттэрин былдьаан ылбыттар. Көрөөччүлэр куоракка баррикада тутуута саҕаламмытын туһунан биллэрэллэр. Бырачыасчыттар "Казахстаан" национальнай судаарыстыбаннай телеханаал филиалын дьиэтин уоттаабыттар. Алма-Ата киинигэр массыыналары, спецтиэхиньикэни уматаллар. Куорат араас чааһыгар мародердар, буруйу оҥорооччулар банкоматтары, маҕаһыыннары үлтү сынньаллар диэн РИА Новости суруйар.

Актобеҕа утарсааччылар полицейскайдары соһон ылан олохтоох дьаһалта дьиэтин баһылаабыттар.
Аральскайга утарсааччылар суол трассатын уонна тимир суолу туоруур муостаны сабардаан тураллар.
Талдыкоргаҥҥа утарсааччылар Назарбаевка анаммыт пааматынньыгы көтүрэн икки аҥы хайытан суолга бырахпыттар.

Ыксаллаах быһыы-майгы эрэсиимэ Нур-Султаҥҥа тохсунньу 19 күнүгэр диэри биллэриллибитэ. Бу да куоракка утарсааччылар бэрэсидьиэн дьаһалтатын дьиэтин штурмалыырга бэлэмнэнэллэр диэн иһитиннэриилэр бааллар.
СМИ иһитиннэриитинэн, Павлодарга дьон киин болуоссаты ыланнар, акиматы кытта аһаҕастык кэпсэтии ирдииллэр.
Оттон Балхаш куоракка металлургическай собуоттар үлэлэрэ тохтотуллубут. Металлургтар бырачыасчыттарга холбоспуттар.

Казахстааҥҥа аймахтарын кытта сибээстэһэр кыахтара суох. Онно сибээс баар дуо?

Суох. "Казахтелеком" оператора дойду үрдүнэн Интэриниэт үлэтин тохтоппут. "Электроннай тосхол " чахчыларынан интэриниэт уонна мобильнай сибээс үлэлээбэттэр.

Ону таһынан дойду СМИ-рэ иһитиннэрэллэринэн, Казахстааҥҥа НТК телеханааллар, Евразия бастакы ханаал уонна КТК биэриилэрэ тохтотуллубут. "Мир" телехампаанньа офиһа урусхалламмыт.

Бырачыастарынан сибээстээн, Актау куоракка аэропорт үлэтин тохтотто, оттон ыксаллаах быһыы-майгы эрэсиимэ биллэриллэн", Аэрофлот" рейстэри тохсунньу 5-с күнүгэр диэри Алма-Атаҕа көтүппэт. Нур-Султан аэропордугар комендантскай чаас киирбитинэн рейстэри тохтоппуттар.