Теплицэни хайдах уонна хаһан бэлэмниир ордугуй?
Саас эрдэ олунньу бүтүүтэ теплицэ буоругар хаар кутабын. Хаар сытан эрэ халлаан сылыйарынан сөптөөх температураҕа ууллан, буору араас наадалаах микроэлеменнарынан байытар уонна сиигирдэр. Саас олордуу иннинэ хайаан да теплицэ иһэ хомуллуохтаах. Поликарбонат теплицэ иһэ хаһаайыстыбаннай мыыланан сууллуохтаах. Сезон устата мунньуллубут буор, быыл күн уота тыгарын мэһэйдэһиэн сөп. Ол иһин хайаан да ис өттүттэн сууллуохтаах.
Сууйан баран дезинфекциялыыбын. Армированнай пленка уонна түннүк тааһа теплицэҕэ сернай шашка уматабын. Поликарбонат теплицэҕэ сернай шашка барсыбат. Тимир конструкциятын быһа сиэн, дьэбин оҥоруон сөп.
Теплицэ буорун бэлэмнээһин туһунан эттэххэ?
Поликарбонат теплицэ буоругар итии оргуйа сылдьар уу кутуллар уонна салапаанынан бүрүллэр. Бу итии паар иһирдьэ тиийдин диэн оҥоһуллар. Паардаммытын кэнниттэн инструкциянан фитоспорины эбэтэр марганцовкалаах ууну кутуохха наада. Быраабыла быьыытынан үүнээйи олорбут буора 3 сыл буола-буола олоччу уларыйыахтаах. Ол гынан баран дьоҥҥо үксүлэригэр ол кыаллыбат. Ол иһин теплицэ эргэ буорун урдун 15 -20 см хостоон ылан саҥа буорунан уларытыахха сөп.
3 биэдэрэ сир кырсын буоругар 1 биэдирэ перегной, 1 биэдэрэ эргэ мас көөбүлэ, 3 ыстакаан мас күлэ, 1 биэдэрэ өрүс кумаҕа, 2 ыстакаан үлтүрүйбүт сымыыт хаҕын кутааччыбын.
Теплицэ кирээдэтин түгэҕэр 20 см курдук сылгы сааҕын кутабын, онтон итии марганцовкалаах ууну кутабын. Сылгы сааҕа сылааһы өр тутарынан үчүгэй.
Эргэ теплицэ буоругар сибиэһэй мас көөбүлүн кутар буоллахха, минеральнай уоҕурдуулары кытта булкуйан кутар наада. Помидор буоругар балбаах кутуллубат. Эргэ мас көөбүлүгэр итии уу кутан баран туттуохха сөп.
Биирдиилээн оҕуруот аһын теплицэҕэ көһөрөр туһунан кэпсээтэххэ?
Помидор олорор миэстэтигэр бэс ыйын бастакы декадатыгар олоруохтаах. Арассаада бөҕө-таҕа 5-6 сэбирдэхтээх буолуохтаах. Лункатыгар 1 остолобуой ньуоска күл, 1 чайнай ньуоска суперфосфат уонна луук хаҕа кутан баран олордобун.
Перец поликарбонат теплицэҕэ ордук үүнэр. Олордорбор лункатыгар эмиэ помидор курдук күл, суперфосфат, луук хаҕа кутабын. Перец температура халбаҥныырын, хамсыырын ордук билинимтиэ буолан, хойут олордор ордук. Эрдэ ситэр кылгас вегетационнай кэмнээх суортары талан олордор ордук. Перец бэйэ-бэйэлэригэр мэһэйдэспэттэрин гына шахматтыы олорор, лункатыгар эмиэ күл, суперфосфат, луук хаҕа кутабын.
Оҕурсу олордор буор 15 кыраадыс сылыйбыт буолуон наада. Мантан намыһах температууралаах буорга олортоххо оҕурсу силиһэ ыарытыйар, үүнээйи ситэ ас биэрбэт, силиһэ сайдыбат. Кыра уктары олордор ордук. Маннык арассаада силиһэ түргэнник саҥа усулуобуйаҕа үөрэнэн, ыалдьыбакка эрэ оннун булар.
-
0
-
0
-
0
-
0
-
0
-
0
