«“Бөртө” сылгы собуота» хааччахтаммыт эппиэтинэстээх тэрилтэ (салайааччы Александр Павлов) Бодоноҕо баар сылгы базатыгар сыллата кымыс сыаҕын үлэлэтэр. Манна уопуттаах сылгыһыт Юрий Уваров эдэр биир идэлээхтэрин кынат оҥостон, биэ ыан кымыстыыр. Кини кымыһын хаҥаластар үгэс буолбут төрүт ньымаларынан оҥорор: мас буочукаларга былырыыҥҥы кымыһынан оҥоһуллубут аһытыыга көөнньөрөр, ураты амтаны биэрээри сылгы бэстээҕин (кэлин атаҕын иҥиирин) кырбаан кутар. Ол түмүгэр, кымыһа кырылыы кыынньар!
– Сопхуос саҕана Степан Максимов биэ ыан кымыстыыра, – диэн кэпсиир Юрий Михайлович. – Киниэхэ сыстаммын, 15 сааспыттан биэни ыырга уонна кымыстыырга үөрэммитим. Бэйэм кымыстаабытым отут сыл буолла. Биэлэри бэс ыйыгар эрэ ыан, ыһыахтары кымыһынан хааччыйабыт. Билигин 13 биэни ыы сылдьабын, биэлэр туруктара үчүгэй, төрүөх да этэҥҥэ. Мэччирэҥ орто соҕус. Бу ыйынан ыан бүтэн, икки биэдэрэ аһытыыны ордорон тоҥорон, эһиилгигэ анаан ууруоҕум.
«Кымыс – Айыы аһа» бэстибээлгэ араас улуустартан кымыһы оҥорууга идэтийбит уон хаһаайыстыба кытынна. Өрөспүүбүлүкэ уопуттаах технолога Розаида Гудуева салалтатын үлэлээбит улахан жюри бу хаһаайыстыбалар үлэлэрин-хамнастарын көрөн-истэн, кымыстарын анал лабораторияҕа чинчийтэрэн баран, түмүгү таһаарда. Онно «“Бөртө” сылгы собуота» ХЭТ кымыһа иккис бириистээх миэстэни ылла!
-
11
-
0
-
0
-
0
-
0
-
1
