Чочур Мыраан тэллэҕэр баар Ботаническай саад 1962 сыллаахха, биологическай ыстаансыйа баазатыгар тэриллибитэ. Дьэ ити кэмтэн ыла Ботаническай саад исписэлиистэрэ соҕуруу дойдулартан төрүттээх сибэккилэр уонна отонноох мастар араас көрүҥнэрин уһун, тымныы кыһыннаах, кылгас сайыннаах уһук хотугу дойду килиимэтин тулуйар суортарын ууһатан таһааран, оройуоннаан, өрөспүүбүлүкэҕэ тарҕатыыга айымньылаахтык үлэлии-хамсыы сылдьаллар.
Биология наукатын кандидата, ыстаарсай научнай үлэһит Светлана Сабарайкина экскурсия кыттыылаахтарыгар отонноох мастар уратыларын, кинилэри хайдах үүннэриэхэ сөбүн туһунан кэпсээтэ.
Ыалдьыттар эҥин эгэлгэ өҥнөөх сибэккилэринэн силигилээн турар Азия лилияларын арааһын бэрэ кэрэхсии көрдүлэр.
– Биһиги Азия лилиятын 80 суордун үүннэрэбит, кыһыҥҥы бытарҕан тымныыны, сайыҥҥы өйүрүк куйааһы бэркэ тулуйаллар, – диэтэ биология наукатын кандидата, ыстаарсай научнай үлэһит Екатерина Афанасьева итиэннэ бу үүнээйини хайдах олордор, көрөр-истэр, тугунан «аһатар» туһунан сиһилии кэпсээтэ.
Биология наукатын кандидата Дария Андросова элбэх сыллаах үүнээйилэри көрдөрдө, олортон сорохторо Арассыыйа уонна Саха сирин Кыһыл кинигэлэригэр киллэриллибиттэрин эттэ.
Биология наукатын кандидата, эмтээх отторго идэтийэр Варвара Семенова экскурсааннары Ботаническай саадка баар 100 араас эмтээх үүнээйилэр эрээттэригэр сырытыннарда. Ханнык үүнээйини хаһан хомуйар, хайдах харайар уонна туохха туһанар туһунан сиһилии быһааран биэрдэ.
Африкаттан, Соҕурууҥҥу уонна Хотугу Америкаттан төрүттээх үүнээйилэр оранжереяларыгар Изольда Ильина эриэхэттэн үүннэриллибит дуубу, лимоннаах мастары, кофены, бананы, сэппэрээктэри уонна да атын араас экзотическай үүнээйилэри билиһиннэрдэ. Экскурсааннар «сиэмэх» үүнээйилэри, ол иһигэр 54 саастаах, сүүнэ улахан агава маһы сөҕө-махтайа көрдүлэр.
Атырдьах ыйын 5-6 күннэригэр сарсыарда 10.00 чаастан Арассыыйа Наукаларын академиятын Сибиирдээҕи салаатын Саха сиринээҕи научнай киинигэр (Дьокуускай к., Петровскай уул. 2 №-ригэр) Ботаническай саад 60 сылын чэрчитинэн «Хотугу лилиялар» бэстибээл ыытыллыаҕа. Онно Азия лилияларын быыстапкалара, кинилэри хайдах үүннэрэр туһунан сэминээр, уопуту атастаһыы, лилиялартан сибэкки дьөрбөтүн, араас композициялары оҥорууга маастар-кылаастар буолуохтара. Кэлиҥ, сылдьыҥ, көрүҥ-истиҥ, кэрэхсээҥ.
- 2
- 2
- 0
- 0
- 0
- 0