Тэриллибитэ уон сыл буолбут бу дьоһуннаахай бырааһынньык сүрүн соруга күннээҕи түбүккэ үтүрүйтэрэн умнуллар сыаннастарга, төрүт үгэстэргэ, айылҕаҕа харыстабыллаахтык сыһыаннаһарга ананар. Бырааһынньык алгыс тылынан, ыраастаныы сиэринэн-туомунан итиэннэ хотугу омуктар параадтарынан саҕаланна.
Түһүлгэҕэ мустубуттары эҕэрдэлээн, Бырабыыталыстыба бэрэссэдээтэлин бастакы солбуйааччы Дмитрий Садовников, Ил Түмэн аҕыйах ахсааннаах төрүт олохтоох хотугу омуктар уонна Арктика дьыаларыгар сис кэмитиэтин бэрэссэдээтэлэ Елена Голомарева, тас сибээс уонна норуоттар дьыалаларын миниистирэ Гаврил Кириллин, Арктиканы сайыннарыы миниистирин солбуйааччы Михаил Погодаев, Арассыыйа Федерациятын Хотугу, Сибиирдээҕи уонна Уһук Илиҥҥи аҕыйах ахсааннаах, төрүт олохтоох омуктарын Ассоциациятын вице-президенэ, Саха Өрөспүүбүлүкэтин аҕыйах ахсааннаах, төрүт олохтоох хотугу омуктарын Ассоциациятын президенэ Андрей Кривошапкин, аҕыйах ахсааннаах, төрүт олохтоох хотугу омуктар бырааптарын боломуочунайа Константин Роббек уо.д.а. эҕэрдэлээтилэр.
– Биһиги өрөспүүбүлүкэбит олох укулаатын араҥаччылыыр сокуоннары таһаарар. Саха Өрөспүүбүлүкэтин норуоттарын ассамблеятын бэрэссэдээтэлэ Александр Подголов көҕүлээһининэн ылыллыбыт, дьиэ кэргэн үгэстэрин харыстыырга-араҥаччылыырга, салгыы сайыннарарга туһуламмыт көс ыал туһунан сокуон бары омуктары түмтэ. Аан дойду уопсастыбаннаһа үрдүктүк сыаналаабыт бу сокуонугар биһиги сэттэ сыл устата үлэлээбиппит, – диэтэ Елена Голомарева.
Салгыы быйылгыттан Арассыыйа Арктикатааҕы зонатын туһунан федеральнай бырагыраамалар, сокуоннар үлэлииллэрин, онно Ил Түмэн дьокутааттара күүскэ үлэлэспиттэрин, чуолаан хаһаайыннааһын үгэс буолбут көрүҥнэригэр судаарыстыба өйөбүлүн туһунан салааҕа кинилэр этиилэрэ учуоттаммытын бэлиэтээтэ. «Онон биһиги табаһыттарбытыгар, аҕа ууһун общиналарыгар федерацияттан өйөбүл баар буолла. Биэс хотугу улууска логистика кииннэрэ тутуллар, ас-үөл сыанатын кинилэр сүрүннүөхтэрэ. Быйылгыттан биһиги оҕолорбут «Арктика оҕолоро» федеральнай бырагыраамаҕа киирдилэр, Арктика улуустарыттан 422 оҕо дойду бастыҥ лааҕырдарыгар сынньаналлар, доруобуйаларын чэбдигирдэллэр – бу өрөспүүбүлүкэ салалтатын сыралаах үлэтин, кыһамньытын түмүгэ буолар, – диэтэ норуот дьокутаата.
Дьоро күн чэрчитинэн куонкурустар, быыстапкалар ыытылыннылар диэн Ил Түмэн пресс-киинэ иһитиннэрэр.
Хаартыскаҕа Айталина Аргунова түһэриилэрэ
-
0
-
0
-
0
-
0
-
0
-
0
