С.С.Васильев-Борогонскай музейыгар оччотооҕу кэм тэрээhиннэрин туһунан долгутуулаах сэһэргэһиини бэтэрээн учуутал, ытык киһи Светлана Ванифатьевна Захарова саҕалаата. Кыһыл Кырдалга түмсүбүт дьон ытыктанар историк-учуутал Иван Иванович Пирожков музей дьиэни туттарыытын, бастакы экспонат дьылҕатын, Сергей Васильев-Борогонскай сэдэх докумуоннарын туһунан олус сэргии иһиттибит. Салгыы поэт үөрэммит, үлэлээбит, 130 сааьын бэлиэтиир кырдьаҕас оскуолаҕа киирэн, итии чэй иһэ-иһэ төбүрүөннээн олорон, Сэргэйбитин ахтан-санаан уонна кини үйэлээх айымньыларын тула кэпсэтэн, хоһооннорун ааҕан, санаа атастаһан, инникини былааннаан бэрт сэргэхтик алтыстыбыт. Суоттутааҕы модельнай библиотека сэбиэдиссэйэ Раиса Николаевна Черкашина Сергей Васильев олоҕуттан быһа тардан кэпсээтэ уонна быйылгы сылга үбүлүөйдээх бэлиэ айымньыларын билиһиннэрдэ. «Түһүлгэ» сынньалаҥ киинин сэбиэдиссэйэ «Дьол туоната» бырайыагын сиьилии ырытан кэлбит дьонно тиэртэ.
Эдэр дьон аатыттан култуура үлэһитэ Илья Парников «Великий Ильмень» балладаны нууччалыы ааҕан иһитиннэрдэ. Биир эмиэ үбүлүөйдээх «Барыта оҕолор иһин» хоһоонун бэтэрээн библиотекарь Фаина Николаевна Ширяева аахта. Суотту орто агро-оскуолатын дириэктэрэ Ирина Михайловна Петухова, оскуолаҕа үөрэнэр эрдэхтэтэриттэн Сергей Степанович Васильев олоҕун, айар үлэтин пропагандистара – библиотекарь Зинаида Николаевна Бочкарева, саха тылын уонна литературатын учуутала Ирина Романовна Ядрихинская кэскиллээх тус санааларын үллэһиннилэр. Сергей Степанович Васильев аатын сүгэр Хоноҕор оскуолатыттан биир чулуу пропангадист -- саха тылын уонна литературатын учуутала Фекла Константиновна Слепцова ыытыллыбыт тэрээhиннэри сырдатта.
Суоттулар төрүкү да Сэргэй Баһылайап курдук бэйиэттээх буоламмыт, кинигэни ааҕары биһириир, кинигэни ааҕар дьону кэрэхсиир, кинигэҕэ, сурукка-бичиккэ ураты сыһыаннаах буола иитиллибиппит. Билиҥҥи кэмҥэ суруйар-бичийэр да дьонноохпут. Бу барыта эккэ-хааҥҥа иҥэн хаалбыт төрүттэрбититтэн уонна үөрэтэн-такайан таһаарбыт учуутал дьоммутуттан сомсон ылбыт улуу бэлэхпит, барҕа баайбыт. Тэрээһини култуура үлэһиттэрэ, уопсастыбаннас бастыҥ лиидэрдэрэ иилээн-саҕалаан ыыттылар. Саҥа санаалар, бугуһуйа сылдьыбыт буруолуу сылдьар сонун идеялар бу күн дьон-сэргэ истиитигэр таҕыстылар. Онон үлэ-хамнас ааспыт үйэ 80-с сылларыгар учуутал Раиса Реасовна Кулаковская, режиссёр Татьяна Афанасьевна Гоголева саҕалаабыт үтүөкэннээх дьыалаларын, үйэлээх дьайыыларын туоһута буолан күн бүгүн саҥалыы тыыннанан олоҕу кытта тэҥҥэ хардыылыыр. Олохтоохтортон Валерий Дмитриевич Заровняев Суотту тэрээhиннэрин ситимнээхтик хаартыскаҕа түһэ үйэтитэрэ олус хайҕаллаах, наадалаах түгэн.
Аны салгыы атырдьах ыйын 26 күнугэр Дьокуускай куоракка Национальнай библиотека историческай саалатыгар С.С.Васильев-Борогонскайга аналлаах «Үйэлэри үрдүнэн үлдьү көтөн» «төгүрүк остуол», атырдьах ыйын 27 күнүгэр Куруһаала киин сыанатыгар «Сэргэй Баһылаайап көмүс күһүнэ» диэн анал бырагыраамалаах бэйиэт айымньыларын түһүлгэтэ Татьяна Афанасьевна Гоголева салалтатынан тэриллэллэр.
Үйэлэри үлдьү көтөр аналлаах биһиги Сэргэйбит кэскиллээх тэрээһиннэрэ кэнэҕэски кэлэр ыччакка кэрэ кэпсээн, дьол туонатын дьоһун тойуга буоланнар, алгыстаах аартыгы арыйа туруохтара!
Саргылаана Семеновна Лебедева, Уус Алдан, Суотту
-
3
-
0
-
0
-
0
-
0
-
0
