«Сир баайын туһунан» сокуоҥҥа бырамыысыланнай тэрилтэлэр эрэгийиэн итиэннэ тустаах муниципальнай тэриллии социальнай-экэнэмиичэскэй сайдыыларыгар кыттыһалларын модьуйар уларытыы баар буолуохтаах диэтэ Айсен Николаев. Итиэннэ Саха сиригэр этнологическай эспэртиисэ туһунан өрөспүүбүлүкэтээҕи сокуон уопутун сырдатта. Бу сокуон үлэлиэҕиттэн, 47 бырамыысыланнай бырайыак аҕыйах ахсааннаах төрүт олохтоох хотугу омуктар общиналарыгар көмөлөспүтүн, компенсация төлөммүтүн, бырамыысыланнай хампаанньалары кытары 34 сөбүлэһии түһэрсиллибитин итиэннэ биэс сыл устатыгар 37 миллиард солкуобай харчы өрөспүүбүлүкэ социальнай-энэмиичэскэй сайдыытыгар көрүллүбүтүн туһунан кэпсээтэ.
– Биир сүрүн бырайыагынан «Арктика оҕолоро» бырайыак буолар. Манна Арктика улуустарыгар үөрэхтээһин боппуруоһун кэлим быһаарыылара, хоту дойду оҕолорун сынньалаҥнарыттан саҕалаан көс оскуолалар материальнай-тэхиньиичэскэй базаларын тупсарыы, учууталлары өйөөһүн, сыыппара технологиятын сайыннарыы уо.д.а. киирэллэр. Биһиги федеральнай таһымҥа туспа бырагыраама итиннэ бырайыагы олоххо киллэрэргэ кэлим сыһыан баар буоларын туруорсабыт, — диэтэ Айсен Николаев.
Салгыы Арктика 40 омугун тылын, нэһилиэстибэтин араҥаччылыыр, сайыннарар мультикултуурунай интэриниэт-портал бырайыагын туһунан кэпсээтэ. Төһө даҕаны сааҥсыйа биллэрилиннэр, төрүт олохтоох омуктарга аналаах бырайыактар Аан дойду таһымынан үлэлиэхтээхтэрин бэлиэтээтэ.
- 0
- 0
- 0
- 0
- 0
- 0