– Судаарыстыбаннас күнүгэр тэриллибит Ил Дархан Айсен Николаев быһа биэриитигэр өрөспүүбүлүкэ олохтоохторун ордук долгутар боппуруостар тыктарылыннылар. ОДьКХ, айан, суол, хаарбах дьиэлэртэн дьону көһөрүү уонна Анал байыаннай дьайыы кыттыылаахтарын дьиэ кэргэттэрин өйөөһүн – бу барыта Ил Түмэн дьокутааттарыттан хонтуруолу эрэйэр уонна тустаах сокуоннарынан күүстээх үлэни ирдиир үлэ буолар.
Анал байыаннай дьайыы кыттыылаахтарын дьиэ кэргэттэригэр аадырыстаах көмөнү оҥоруу боппуруоһа норуот дьокутааттарын ураты хонтуруолларыгар тутуллар. Төлөбүрү оҥорторууга, кыһыҥҥы оттугу-уматыгы бэлэмнээһиҥҥэ эбэтэр социальнай көмөнү ылыыга үөскүүр мэһэйдэр тустарынан этиилэр, иһитиннэриилэр бүрүкүрээт балакыытата суох тута көрүллүөх тустаахтар, онуоха Ил Түмэн мэхэньиисим харгыстаныытын туоратар, алҕаһы көннөрөр сокуоннары оҥоруохтаах.
Парламент ону таһынан, хомунаалынай инфраструктура уонна тырааныспар тииһилэҥнээх буолуутун боппуруостарын быһаарыыга үлэлэһэр. Оттук сезона саҕаланар кэмэ буолан, кыраасданнар миэстэҕэ бүддьүөт үбүн-харчытын көдьүүстээхтик туһанар сыалтан, сылытар ситимнэри өрөмүөннээһини уонна салайар хампаанньалар үлэлэрин парламент кытаанахтык хонтуруоллуурун ирдииллэр.
Нэһилиэнньэттэн киирэр хас биирдии этии Ил Түмэн сис кэмитиэттэрин үлэтигэр матырыйаал буолар. Судаарыстыбаннай Мунньах бары күүһүн-кыаҕын кыһалҕалаах боппуруостары быһаарыыга тирэх сокуоннары оҥорорго итиэннэ ол толоруллуутун хонтуруоллуурга туһаайар.
-
6
-
0
-
0
-
0
-
0
-
0
