Бүгүн Ил Түмэҥҥэ бу сытыы боппуруоһу дьүүллэһэргэ, дьоҕус авиация кыһалҕатын быһаарарга, тырыыныспар сырыытын тупсарарга, дьон субсидиялаах билиэккэ тиксэрин хааччыйарга төгүрүк остуол ыытылынна.
Мунньаҕы Хотугу аҕыйах ахсааннаах норуоттар боппуруостарыгар уонна Аартыка дьыалаларыгар сис кэмитиэт бэрэссэдээтэлэ Елена Голомарева ыытта.
Ил Түмэн бэрэссэдээтэлин солбуйааччы Афанасий Владимиров дьон айанныырыгар, сөмөлүөтүнэн көтөрүгэр олохтоммут билиэт сыаната нэһилиэнньэ дохуотугар сөп түбэһэр буолуохтааҕын санатта.
СӨ Тырааныспарга уонна суол хаһаайыстыбатыгар миниистир бастакы солбуйааччыта Анатолий Потапов сөмөлүөт түһэр-көтөр балаһааккалара эргэрбиттэрин, ону өрөмүөннүүр уолдьаспытын иһитиннэрдэ. Кини олохтоох авиация кыһалҕатын быһаарарга, флоту саҥардарга, өрөмүөннүүргэ сыл ахсын бүддьүөккэ сайаапка киллэрэллэр эрээри, ол өйөммөккө, ситэ үбүлэммэккэ хааларын туһунан эттэ.
«Полярные авиалинии» авиахампаанньа генеральнай дириэктэрэ Семен Винокуров сөмөлүөт уматыга, мотуора, саппаас чааһа ыараабыта, аэропуорка көтөр аал түһэрин-көтөрүн хааччыйыы төлөбүрэ үрдээбитэ билиэт сыанатыгар охсорун бэлиэтээтэ. Чуолаан сааҥсыйа, хааччах кэмигэр арҕаа дойдулартан саппаас чааһы аҕалар уустугурда.
L-410 уонна Швейцарияҕа оҥоһуллубут «Pilatus» сөмөлүөт мотуорун саппаас чааһа көстүбэккэ былырыыҥҥаттан бу тиэхиньикэттэн аккаастаннылар.
Улуустарга көтөр АН-24, АН-26 сөмөлүөттэр барахсаттар 50-ча сыл тухары үйэлэрин моҥоотулар, кинилэр көтөр болдьохторун өссө 60 сылга диэри уһатарга быһаарыммыттар. Дойду үрдүнэн бу сөмөлүөтү өрөмүөннүүр биир эрэ собуот хаалбыт. АН-24 сөмөлүөт мотуорун сыаната 10 мөл. солк. 55 мөл. солк. диэри ыараабыт.
2024 с. субсидияламмыт билиэтинэн 41331 киһи туһаммыт, ити авиахампаанньа пассажирдарыттан 20% ылар. Былырыын былаан таһынан 1907 киһи улуустарга айаннаабыт, социальнай суолталаах хайысханан 143 эбии рейсэ оҥоһуллубут. Өрөспүүбүлүкэ бүддьүөтүн иэһэ 131 мөл. солк. тиийбит, эрэгийиэн иһинээҕи хайысханан 2025 с. 191,7 мөл. солк. субсидия көрүллүбүт, социальнай маршруттарынан 84,8 мөл. солк. Ити үбүлээһин кээмэйэ 2024 с. көрдөрүүтүттэн 3,3-5 төгүл кыра.
СӨ Тырааныспарга уонна суол хаһаайыстыбатыгар миниистиэристибэ туруорсуутунан, авиахампаанньа быйыл 224 мөл. солк. суумалаах 11642 субсидияламмыт билиэти атыыга таһаарда. 2025 с. 191 мөл. солк. субсидия "Якутия" авиахампаанньаҕа бэриллиннэ. Семен Винокуров этэринэн, былырыыҥҥы иэһи ааҕан туран, 14 Аартыка улуустарыгар дьону тиэйэргэ өрөспүүбүлүкэ бүддьүөтэ 257 мөл. солк. авиахампаанньаҕа иэстээх.
Онон «Полярные авиалинии» авиахампаанньа бу сыл бүтүөр диэри Аартыка улуустарыгар субсидияламмыт билиэт атыытын тохтоторго күһэллиннэ. Тэрилтэ сүрүн ыстаапка үрдээн турар кэмигэр баантан 25% кирэдьиити ылан төлүүр. Былырыын 400 мөл. солк. тахса үбү аҥаардас кирэдьиит бырыһыанын төлүүргэ ыыппыттар.
МИ-8 МТВ бөртөлүөт мотуора 100 мөл. солк. Көтөр тиэхиньикэ үс мотуорун саҥардарга 330 мөл. солк., ону таһынан, АН-24 икки мотуорун атыылаһарга 100 мөл. солк. ирдэнэр. Бу үбү буларга 2025 с. авиахампаанньа бүддьүөттэн көрүллэр субсидияҕа, норуот дьокутааттарын өйөбүлүгэр наадыйарын биллэрдэ.
Билиҥҥи туругунан, нэһилиэнньэ 20% субсидиялаах билиэккэ тиксэр, оттон Уһук Илин атын эрэгийиэннэрин олохтоохторо 100% чэпчэтиилээх билиэттэринэн хото туһаналлар. Былырыын Саха Сиригэр субсидиялаах билиэккэ бүддьүөттэн 951 мөл. солк. көрүллүбүт, оттон нэһилиэнньэни хааччыйарга 5 млрд. солк. ирдэнэр.
Итиниэхэ олоҕуран, Ил Түмэн доруобайаҕа харыстабылын сис кэмитиэтин бэрэссэдээтэлэ Светлана Давыдова бастатан туран, сүрэх-тымыр, искэн ыарыылаахтары, куоракка төрүү кэлэр дьахталлары субсидияламмыт билиэтинэн хааччыйарга этии киллэрдэ. Онтон ортоҕуна атыттар туһаныахтарын сөп.
Ол туһунан сиһилии «Ил Түмэн» хаһыат кэлэр нүөмэригэр ааҕыҥ.
Василий Кононов хаартыскаҕа түһэриитэ.
-
0
-
0
-
1
-
3
-
2
-
38
