Саха сирин авиациятын 100 сылын бэлиэтиир тэрээһиннэр алтынньы 8 күнүттэн саҕаламмыттара. Сэтинньи 12 күнүгэр тэрийэр кэмитиэт түмүгү таһаарда уонна көхтөөх кыттыбыт дьону наҕараадалаата.
– 100 сыл – улахан кэрдиис кэм. Дьокуускайдааҕы авиация дьоҕус гидропланертан улахан лайнерга тиийэ сайынна. Былатыан Ойуунускай киэҥ-нэлэмэн сирдээх-уоттаах өрөспүүбүлүкэни авиацията суох сайыннарар кыаллыбатын өйдөөбүтэ. Аҕа дойду улуу сэриитин сылларыгар улахан хардыы оҥоһуллубута, 8 аэропорт тутуллубута. 80-с сылларга авиация устуоруйатыгар бэлиэ түгэннэр буолбуттара, авиация өрөспүүбүлүкэҕэ бырамыысаланнас сайдыытыгар сүҥкэн суолталаммыта. Биһиги бүгүн сайдыы саҥа саҕахтарын арыйабыт. Өрөспүүбүлүкэ иһигэр да, тас да өттүгэр элбэхтик көтөбүт. Авиация – Саха сирин социальнай-экэнэмиичэскэй сайдыытыгар уонна олохтоохторугар сүрүн суолталаах хайысха, – диэн Росавиация Саха сиринээҕи управлениетын салайар Олег Ворошилов эттэ.
СӨ Тырааныспарга уонна суол хаһаайыстыбатыгар миниистирэ Владимир Сивцев үбүлүөйдээх сыл тэрээһиннэрин былааныгар уопсайа 45 пуун баарыттан бүгүҥҥү туругунан 38-һа тэриллибит. 5 сорук үлэҕэ сылдьар.
– Авиация 100 сылыгар В.И. Гришуков аатынан гражданскай авиация тэхиньиичэскэй училищетын үөрэнэр куорпуһугар бэлиэ тааһы үөрүүлээх быһыыга-майгыга уурбуппут. Авиация бэтэрээннэрэ, үтүөлээх үлэһиттэрэ кыттыылаах киэҥ далааһыннаах тэрээһиннэр буоллулар. “Полярные авиалинии” хампаанньа биир бөртөлүөтүгэр “Саха сирин авиациятын 100 сыла” аат иҥэрилиннэ. Бу тэрээһиннэр көхтөөх актыбыыстара, көҕүлээччилэрэ суох маннык үрдүк таһымнаахтык тэриллэллэрэ уустук. Үбүлүөйдээх тэрээһиннэр өссө да салҕаналлар. Москубаҕа Саха сирин гражданскай авиациятын бэтэрээннэрин чиэстээһин буолуоҕа. Манна 100-тэн тахса киһи кыттара былааннанар, – диэн Владимир Сивцев сырдатта.
Саргын СКРЯБИН хаартыската.
-
0
-
0
-
0
-
0
-
0
-
0
