-- Өрөспүүбүлүкэ киин быыбардыыр хамыыһыйата куоластааһыны ыытыыга бэлэмнэнии үлэтин олунньу ыйтан саҕалаабыта. Үлэ былаана туолан иһэр. Мин икки түгэни тоһоҕолоон бэлиэтиэхпин баҕарабын. Ол курдук, ыраах сытар суола-ииһэ суох сирдэргэ үлэлии-хамсыы сылдьар дьон куоластааһыннарын тэрийии уонна өрөспүүбүлүкэ киин быыбардыыр хамыыһыйата куоластыыр дьон доруобуйатыгар куттала суох буолууну хааччыйыытын туһунан.
Ол курдук ыраах сытар суола ииһэ суох сирдэргэ баар дьоҥҥо, ол эбэтэр табаһыттарга, булчуттарга, балыксыттарга, метеорологтарга, геолоктарга дойду бүттүүнүгэр буолар куоластааһыны 20 күнүнэн эрдэ тэрийэр сорук турбута. Ол эбэтэр, бэс ыйын 10 күнүттэн үлэ ыытыллан барбыта. Маннык куоластааһынынан барыллаан 8 тыһыынча киһи хабыллар.
Болдьоҕун иннинэ куоластааһыны 140 учаастактааҕы хамыыһыйа тэрийэн ыытыаҕа. Барыта 28 муниципальнай оройуоннар территорияларыгар ыытыллыаҕа. 10 оройуонугар сиринэн уонна уунан эрэ тиийэбит. 18 оройуоҥҥа салгын тырааныспарт туттуллуохтаах.
Ыраах сытар сирдэргэ аҕыйах ахсааннаах дьонноох бөлөхтөргө быыбардыыр хамыыһыйа чилиэннэрэ салгын, уу уонна сиринэн тырааныспардарынан тиийэн, куоластааһыны миэстэтигэр тэрийиэхтэрэ.
Бэс ыйын 15 күнүттэн саҕалаан куоластыыр хамыыһыйа чилиэннэрэ ыраах сытар суола-ииһэ суох сирдэргэ тиийэн куоластааһыны тэрийэн эрэллэр. 16 сирдэринэн куоластыыр учаастак үлэһиттэрэ таҕыстылар. Бүгүн, бэс ыйын 17 күнүгэр Кэбээйигэ уонна Эбээн-Бытантаайга баар ыраах сытар сирдэргэ бөртөлүөтүнэн бүллүтүөннэри уонна куоластыырга ирдэннэр тэриллэри илдьэ учаастак үлэһиттэрэ көттүлэр, бэс ыйын 18 күнүгэр онно баар дьон куоластыахтаахтар.
Иккис тоһоҕолон бэлиэтиир түгэним – пандемия сатыылаабыт уустук күннэр-дьыллар кэмнэригэр буолар куоластааһыны төһө кыалларынан дьон доруобуйатыгар куттал суоһаабатын курдук ыыта сатыахтаахпыт. Ол курдук, муниципальнай тэриллии бары куоластыыр учаастактарын үлэһиттэрэ дьаҥтан харыстанар тустаах сириэстибэлэри тиэрдии үлэтэ ыытыллар. Ону кытта куоластыы кэлбит хас биирдии киһиэхэ бакыат бэриллиэҕэ, бакыат иһигэр мааска, бэрчээккэ, уруучука баар буолуоҕа. Куоластыыр учаастактар дьиэлэрэ ыйыллыбыт кэмнэригэр санитарнай ыраастааһыны ааһыахтара. Муосталарыгар дьон бэйэ-бэйэлэриттэн тэйиччи тутта сылдьарын курдук сурааһыннар тардыллыахтара. Үлэһиттэр уонна куоластыы кэлбит дьон температуралара кээмэйдэниэхтэрэ. Быйыл куоластыыр хамыыһыйа үлэһиттэрэ куоластааһын туһунан дьиэлэри кэрийэ сылдьан иһитиннэрии оҥорботулар. Тоҕо ол үлэни ыыппатахпыт – өйдөнөр. Ол оннугар интернетынанан, ТВ биэриинэн информацияны тиэрдэр роликтар таҕыстылар.
Маны таһынан быйыл “Мобильный избиратель” диэн ситим үлэлээбитэ. Бэс ыйын 17 күнүнээҕи туруган 803 киһиттэн ханна, хайдах куоластыылларын туһунан сайабылыанньа киирбит. Ол онтон 409 сайабылыанньа олохтоох куоластыыр хамыыһыйалар, 57 сайабылыанньа “Мин докумуоннарым” элбэх функцияны толорор кииннэр, 307 куоластыыр учаастактар нөҥүө киирбиттэр.
Онон өрөспүүбүлүкэ дьонун-сэргэтэ бэс ыйын 25 күнүттэн от ыйын 1 күнүгэр буолар дойду бүттүүн куоластааһыныгар көхтөөхтүк кэлэн кыттыаҕа диэн эрэнэбит.
-
0
-
0
-
0
-
0
-
0
-
0
