Дьон уутун уйгуурдар быһыыга улаханнык тэлэбииһэри, магнитофону, тыас таһаарар атын тэрили туттааһын, музыкальнай инструмеҥҥа оонньооһун, хаһыы-ыһыы, иһиирии, ырыа-тойук, өрөмүөн үлэтин ыытыы киирэр.
Үлэ күнүгэр киэһэ 21 ч. сарсыарда 8 ч. диэри ити үөһэ ыйыллыбыт тыаhы-ууhу таһаарыы бобуллар. Өрөбүлгэ уонна бырааһынньык күн киэһэ 22 ч. сарсыарда 10 ч. диэри тыаһыа суохтааххын, ону таһынан, күн аайы 13 ч. -15 ч. диэри чуумпу кэми тутуһуохтааххын.
Саҥа тутуллубут дьиэ үлэҕэ киирбитин бастакы 1,5 сылыгар эбиэт кэмигэр өрөмүөн үлэтин ыытар көҥүллэнэр эрээри, түүн тыас тохтуохтаах.
«Өскөтүн ыалларгыт түүн утуппатахтарына, полицияҕа биллэриэххэ наада. Полиция СӨ КоАП 3,5 ыст. олоҕуран, боротокуол толорон, административнай хамыыһыйаҕа ыытар. Чааһынай дьоҥҥо ыстараап кээмэйэ 1000 – 5000 солк., дуоһунастаах дьоҥҥо, урбаанньыттарга 10 000 – 50 000 солк., юридическэй сирэйдэргэ 50 000 – 250 000 солк.», — диэн быһаарар Дьокуускай куорат уокуругун административнай хамыыһыйатын бэрэссэдээтэлэ Феликс Антонов.
Дьокуускайга 2023 с. 1 кыбаарталыгар полиция үлэһиттэрэ бу ыстатыйанан 371 боротокуолу толорбуттар, оттон былырыын бу кэмҥэ 97 боротокуол киирбитэ.
Хаартыска: Казахстанская правда
-
0
-
0
-
0
-
0
-
0
-
0
