Айсен Николаев бу бырагыраамаҕа кыттарга Саха сирэ Дьокуускай, Мирнэй, Нерюнгри, Алдан уонна Томмот куораттарга барыта холбоон 850 арендаланар кыбартыыраны тутарга анаммыт 11 бырайыагы киллэрбитин туһунан кэпсээтэ.
-- Ордук элбэх эдэр исписэлиис уонна устудьуон Дьокускай куоракка олорор. Мирнэй, Нерюнгри, Алдан уонна Томмот сир баайын, сырьену, чоҕу хостооччулар олорор куораттара. Онон үрдүк кылаастаах исписэлиистэри тардан, кинилэри олохсутан үлэлэтии өрөспүүбүлүкэ экэниэмикэтин сайдыытын биир сүрүн соруга буолар, – диэтэ.
Салгыы арендаҕа бэриллэр дьиэни-уоту тутууга биисинэс кыттыытын көҕүлээһин үлэтэ Саха Өрөспүүбүлүкэтигэр 2018 сылтан, хамсаабат баайы-дуолу, олорор дьиэни-уоту салайар уонна арендалыыр тэрилтэлэр бас билиилэрин нолуогар 100 %-наах чэпчэтии олохтонуоҕуттан, саҕаламмытын туһунан бэлиэтээтэ. Арендаланар кыбартыыралары ылар бырааптаах гражданнар кэрискэлэрин үлэ ресурсатын уонна каадырдарга наадыйыыны учуоттаан оҥорор кыаҕы эрэгийиэннэргэ биэрэргэ этии киллэрдэ.
Саха сирэ Арассыыйа субъектарыттан биир бастакынан, 2018 сыллаахха, Дьокуускайга арендаҕа бэриллэр дьиэ-уот пуондатын тэрийбитэ. Пуонда улахан аҥаара ырыынак сыанатыттан 50 % чэпчэтиилээх сыананан социальнай арендаҕа анаммыта уонна уһун болдьоххо эмтэнэ, доруобуйаларын туругун чэбдигирдэ кэлэр инбэлииттэр олорор дьиэҕэ наадыйыыларын кыһалҕатын быһаарбыта.
Айсен Николаев бөдөҥ бырамыысаланнай тэрилтэлэр бэйэлэрин үлэһиттэрин олорор усулуобуйаларын тэрийиигэ эмиэ үлэлииллэрин бэлиэтээтэ. Онуоха «Полюс Алдан» хампаанньа Алын Кураанах бөһүөлэгэр бэйэтин үлэһиттэрин олордорго анаан, арендаланар дьиэлэри тутуу бырайыагы олоххо киллэрэ сылдьарын холобурдаата. 2024 сыл бүтүөр диэри 120 кыбартыыра үлэҕэ киллэриллиэхтээх. «Мир-Глубокий» бырайыак саҕаламмытынан, АЛРОСА хампаанньа арандаланар дьиэни-уоту тутуу бырагырааматынан үлэлииргэ бэлэм.
--Саха сирэ тутууга бэлэм, тутуу кээмэйэ чопчу уонна өйдөнөр. Дьокуускайга эрэ буолбакка, атын куоратарга эмиэ арендаҕа бэриллэр дьиэни тутуу бырагырааматын олоххо киллэрии кыаллар суол. Бу үлэ биһиэхэ олорор дьиэ-уот саҥа итиэннэ дьоҥҥо-сэргэҕэ олус наадалаах ырыынагын тэрийэр кыаҕы үөскэтиэҕэ, – диэтэ Айсен Николаев.
Санатан эттэххэ, Владимир Путин Уһук Илиҥҥэ дьоҥҥо тииһилэҥнээх, арендаланар дьиэни-уоту тутар туһунан сорудаҕы былырыыҥҥы пуорумҥа биэрбитэ. Барыта 10 тыһ. маннык дьиэ тутуллан, 35-тэригэр диэри саастаах эдэр исписэлиистэргэ, үөрэхтээһин, доруобуйа харыстабылын эйгэтин үлэһиттэригэр, устудьуоннарга арендаҕа бэриллиэхтээх. Бу туһунан Ил Дархан уонна Бырабыыталыстыба пресс-киинэ суруйар.
Хаартыскаҕа Андрей Сорокин (ЯСИА) түһэриитэ.
-
0
-
0
-
0
-
0
-
0
-
0
