Хаҥалас улууһун Сиинэ агрооскуолатыгар (дириэктэр Дмитрий Сакердонов) хомуур хайдах баран иһэрин туһунан биһиги уопсастыбаннай кэрэспэндьиэммит Саргылаана Асекритова маннык кэпсээтэ:
– Сиинэ орто оскуолата агротехнологическай хайысханан үлэлээбитэ номнуо 12 сыл буолла. Производственнай үөрэхтээһин маастара Марина Филиппова салалтатынан үөрэнээччилэр саас эрдэттэн саҕалаан, 2000 сайыҥҥы сибэкки, 1000 помидор, 500-түү оҕурсу, биэрэс, хаппыыста арассаадатын олордон, нэһилиэнньэҕэ батараллар уонна оскуола таһынааҕы учаастакка олордоллор. Саас үс гектар бааһынаҕа хортуоппуйу, икки гектар бааһынаҕа оҕуруот аһын арааһын, оттон тэпилииссэлэргэ оҕурсуну олордубуттара. Ону сайын устатыгар Аксиния Никодимова начальниктаах Үлэ уонна сынньалаҥ лааҕырын оҕолоро көрдүлэр-иһиттилэр. Былырыын үс туонна хортуоппуйу, икки туонна хаппыыстаны хомуйан, оскуола остолобуойун толору хааччыйбыттара, ордубутун Сиинэ, Үөдэй уонна Мохсоҕоллоох бөһүөлэктэрин олохтоохторугар батарбыттара. Быйыл да оччоттон итэҕэһэ үүнүүнү хомуйарга эрэллээхтэр. Билигин хортуоппуйу хомуйа сылдьаллар, ол бүттэ даҕаны, хаппыыста быһыытыгар турунуохтара.
-
0
-
0
-
0
-
0
-
0
-
0
