Федерация Сэбиэтин 486-с мунньаҕар “Уһук Хоту оройуоннартан уонна кинилэргэ тэҥнэммит түөлбэлэртэн көһөр дьону дьиэ-уот субсидиятынан хааччыйыы туһунан” федеральнай сокуон уларыйыыларын бигэргэттилэр.
Докумуону Сэбиэт истиитигэр Федерация Сэбиэтин федеративнай тутулга, эрэгийиэннээҕи бэлиитикэҕэ, бэйэни салайыныы уонна хоту түөлбэлэр дьыалаларыгар сис кэмитиэт бэрэссэдээтэлин солбуйааччы Александр Акимов киллэрдэ.
Федеральнай сокуон Уһук Хоту оройуоннартан көһөн барар дьоҥҥо дьиэ-уот атыылаһалларыгар уонна тутталларыгар бэриллэр субсидия усулуобуйаларын чуолкайдыыр. Ону таһынан докумуон кимнээх оннук субсидияҕа тиксиэхтэрин сөбүн чопчулуур.
Сокуон көһөн барааччыларга бэриллэр дьиэҕэ-уокка сэртипикээт бэриллэр бэрээдэгин олохтуур уонна сэртипикээттэн аккаастанар түгэннэригэр туох бырааптаахтарын этэр.
РФ Бырабыытылыстыбата эрэгийиэннэргэ бу сыалга көрүллэр үбү-харчыны тыырар боломуочуйаланар. Бигэргэммит сокуон социальнай суолталааҕынан, Федерация Сэбиэтэ федеративнай тутулга, эрэгийиэннээҕи бэлиитикэҕэ, бэйэни салайыныы уонна хоту түөлбэлэр дьыалаларыгар сис кэмитиэтигэр сокуон олоххо киириитин ситиһэри тус хонтуруолугар ыларыгар сорудахтаата.
Федерация Сэбиэтин пресс-сулууспатын матырыйаалынан.
-
0
-
0
-
0
-
0
-
0
-
0
