Нам улууһун килбэйэр киинигэр, оптуобус тохтобулугар турар «Уран Суши» кафеҕа дьон быыстала суох сылдьар. Бу -- Анатолий Журавлевич социальнай хантараак көмөтүнэн тэриммит дьарыга.
Кини төрүт Нам олохтооҕо. Кэргэннээх, икки кырачаан оҕолоох. Биисинэскэ кэлбитин туһунан маннык кэпсиир:
-- Социальнай көмүскэл улуустааҕы управлениетын нөҥүө 2024 сыл балаҕан ыйыгар 500 тыһыынча солкуобай суумалаах социальнай хантарааҕы түһэрсибитим. Онно бэйэм эбии харчы уган, араас тэрили, ол иһигэр, икки сиэксийэлээх холодильнигы, морозильнигы, пицца буһарар оһоҕу, анал остуоллары, стеллажтары о.д.а. атыыласпытым. Дьоҥҥо табыгастаах буоллун диэн, оптуобус тохтобулугар турар тутууну куортамнаспытым.
Дьиҥэ, бу эйгэҕэ отой туораттан кэлбит киһи буолбатахпын. Идэбинэн тыа хаһаайыстыбатын бородууксуйатын астаан-үөллээн таһаарыы технолога буолабын. Бу иннинэ Дьокуускайга суши оҥорор эрэстэрээннэргэ үлэлээн уопутурбутум. Ону таһынан, ыарахан уйуктаах «БелАЗ», «КамАЗ» массыыналарга суоппардаабытым.
Кэргэннэнэн, оҕолонон баран, бэйэбэр үлэлииргэ быһаарыммытым. Дьаһалта, социальнай управление исписэлиистэрэ улаханнык өйөөбүттэрэ, хас биирдии докумуону толорууга сүбэ-ама биэрбиттэрэ. Биисинэһи төрүттүүргэ анал үөрэҕи ааспытым. Саамай долгутуулаах түгэн биисинэс-былааны көмүскээһин этэ. Көрүдүөргэ олус долгуйан турарбын билигин даҕаны бу баар курдук саныыбын.
Үлэбин саҕалыырбар докумуоннары толорууга ыарырҕаппытым. Билигин арыычча үөрэнним. Үлэм кыралаан кэҥээн иһэр. Менюбун оҥорорбор дьон сөбүлүүр, ордук хамаҕатык атыылаһар аһын киллэрэбин. Ордук сушилар, пиццалар нобуордарын атыылаһаллар. Сотору Рамены оҥорон холонуохпут. Чугас нэһилиэктэргэ сакааһынан тиэрдэбит. Улууспут киинигэр күрэстэһии баар буолан, үлэлииргэ да көхтөөх. Сарсыарда 10 чаастан киэһэ 10-ҥа диэри үлэлиибит. Социальнай хантараагы таһынан, угуйуктары оҥорорго, баннердары бэчээттэтэргэ «Сбербаантан» 40 000 солк. көмөнөн туһаммытым, онно Биисинэс-инкубатор көмөлөспүтэ.
Итинник көмө, өйөбүл көрүҥнэрэ баара тыа сиригэр үлэни-хамнаһы тэринэргэ олус туһалаахтар. Бэйэтин тургутан көрүөн баҕалаах дьоҥҥо кыаҕы биэрэллэр. Онуоха докумуоннары толорортон, эккирэтэртэн толлумуохха эрэ наада. Туох барыта киһи бэйэтин илиитигэр!
-
0
-
0
-
0
-
0
-
0
-
0
