Светлана Давыдова Саха сиригэр сыл устатыгар эмп үлэһиттэригэр саба түһүү аҕыс түбэлтэтэ тахсыбытын, олортон биир да дьыала суукка тиэрдиллибэтэҕин туһунан кэпсээтэ. Хас да этиини киллэрдэ. Бастакыта, «эмп көмөтө» диэн кэлим өйдөбүлү «Гражданнар доруобуйаларын харыстабылын төрүттэрин туһунан» федеральнай сокуоҥҥа киллэрии. Тоҕо диэтэххэ, эмп үлэһиттэрин кытары суутунан быһаарсыыга РФ Холуобунай кодексатын 238 ыстатыйатынан, «эмп өҥөтө» диэн өйдөбүл туттуллар, оттон атын түбэлтэлэргэ «эмп көмөтө» диэн өйдөбүл туттуллар.
– «Эмп көмөтө» диэн кэлим өйдөбүл хайа эрэ өттүнэн эмп үлэһиттэрин көмүскэлин хааччыйар, – диэтэ Светлана Давыдова.
Иккис этии эмп үлэһитин статуһун сокуонунан бигэргэтиигэ туһаайылынна. «Эмп үлэһитигэр саба түһүү син биир полиция биитэр суут үлэһитигэр саба түһүү курдук көрүллүөх тустаах», – диэтэ норуот дьокутаата.
Үсүһүнэн, саба түһүүгэ быраас хайдах дьайыахтааҕын туһунан чопчу быһаарыы наада, билигин оннук суох эбит.
Норуот дьокутаата Иван Луцкан быраас идэтин престиһэ билигин намыһах таһымҥа турарын, эмп үлэһитэ туох да көмүскэлэ суоҕун, сорох пациеннар эмчиттэри видеоҕа, хаартыскаҕа түһэрэн баран, социальнай ситимнэргэ ыытан кэбиһэллэр диэтэ. Саха сирин уратытын учуоттаан, эмтиир үлэнэн туспа дьарыктанар норуот эмчиттэригэр страховка киллэрэргэ эттэ. Бу туһунан Ил Түмэн пресс-сулууспата иһитиннэрэр.
-
1
-
0
-
0
-
0
-
0
-
0
