Уопсастыба

Ити курдук, «Сахапарламент» саайка 2023 сылга элбэх болҕомтону тарпыт сахалыы матырыйаалларынан буоллулар:

1. «Күүстээх, хоһуун санаалаах хорсун Боотурдар». Ааптар Марианна Тыртыкова, 9416 көрүү.

Ырытыы. «Боотур» баҕа өттүнэн анал байыаннай дьайыыга барар уолаттар этэрээттэрин хорсун быһыытын туһунан уос номоҕо элбэх. Онтон биирэ – маннык. Өстөөх икки өттүнэн ытыалыы турдаҕына, «УРАЛ» массыынаҕа зенитнай тэрил тиэйэн баран, аһаҕас хонуу ортотугар сүүрдэн киирэн, байыаннай ыскалааттарын тоҕута ытыалаабыттар. Ол кэннэ, сахаларга уруй-айхал ньиргийдэ, байыастары «Эр санаа» уордьаныгар түһэрдилэр.  

2. «Хотугу сирдэри «Аартыка суоллара» тоҕоостоох оҥорор». Ааптар Сардаана Кузьмина, 7979 көрүү

Интервю. Хотугу улуустарынан суолу оҥорор тэрилтэни тэрийии бэйэтэ туспа силистээх-мутуктаах. Ол курдук, «Аартыка суоллара» тэриллиэн иннинэ, хотугу улуустарга таһаҕаһы сүрүннээн өрүһүнэн уонна көтөр аалынан тиэрдэллэрэ. «Аартыка суоллара» генеральнай дириэктэрин солбуйааччыта Сергей Сивцевы кытары кыһыҥҥы суолу оҥоруу үлэтин-хамнаһын туһунан кэпсэттибит.

3. Педагог уонна уһуйааччы / Феодосия Габышева: "Педагог ыстаатыһын туһунан сокуону оҥоробут" (видео), видео, ааптар редакция, 6026 көрүү

Видео. «Сахапарламент» саайт "Педагог уонна уһуйааччы" сылынан сибээстээн анал рубриканан сыл устата үөрэх үлэһиттэрин уонна уһуйааччыларын туһунан сырдатта. Ыалдьыт - Ил Түмэ Билимҥэ, үөрэхтээһиҥҥэ, култуураҕа, сонуннары киэҥник тарҕатар сириэстибэлэргэ уонна уопсастыбаннай тэрилтэлэргэ сис кэмитиэтин бэрэссэдээтэлэ Феодосия Габышева.

4. «Биэс сыл устата норуот дьокутааттара тугу ситистилэр?». Ааптар Василий Прокопьев, 5944 көрүү.

Сонун. Ил Түмэн бэрэссэдээтэлэ Алексей Еремеев Саха Сирэ «Күнтэн күн» биэриигэ СӨ алтыс ыҥырыылаах Ил Түмэнэ биэс сыл устата ыыппыт үлэтин, ситиһиилэрин, ханнык сүдү суолталаах сокуоннар ылыныллыбыттарын, туох ыарахаттары көрсүбүттэрин туһунан кэпсиир.

5. «Саамай күндү баайыҥ — дьиэ кэргэниҥ». Ааптар Марианна Тыртыкова, 5888 көрүү

Интервью. Уйулҕа үөрэхтээхтэрэ этэллэринэн, ийэтин-аҕатын, өбүгэлэрин ытыктыыр, айылҕа сокуонун билэр, ону тутуһар киһи олоҕор табыллар. Саҥа үйэ удаҕана Ольга Кривошапкина – Сайдыына биэс сыл иһигэр социальнай ситимҥэ 78 000 сурутааччыланна, кини Аар Айылҕа сокуоннарын, духуобунас туһунан видеоларын аан дойду араас уһугуттан киирэн көрөллөр. Дьиэ кэргэн суолтатын туһунан кини бу курдук кэпсиир.

6. «Олоҥхото суох олохпун сатаан көрбөппүн…». Ааптар Анисия Иелева, 5787 көрүү

Интервью. Олоҥхо ыһыаҕар кини култуура волонтерунан үлэлии барбыта. Өймөкөөн Томторугар хас да күн иннинэ тиийэн, үлэ бөҕөтүгэр түспүттэрэ: хомуйуу-сууйуу, илдьии- таһыы, оҥоруу-толоруу… Олоҥхотугар анаан бэлэмнэнэр да солото суох сылдьыбыта.

7. «Суоппардарга сокуон күүһүрэр». Ааптар Василий Прокопьев, 5754 көрүү

Сонун. Дойду Бэрэсидьиэнэ Владимир Путин итирик туруктаах сылдьан, административнай эппиэтинэскэ тардыллыбыт суоппар иккиһин эксээмэни туттарарын уонна дастабырыанньаны биэриини бобор туһунан федеральнай сокуоҥҥа уларытыылары киллэрэргэ илии баттаабытын туһунан матырыйаал.

8. «Саха Сирин 14 нэһилиэгэр мобильнай сибээс холбонуоҕа». Ааптар Василий Прокопьев, 5593 көрүү

Сонун. Сыл бүтүөр диэри «Ростелеком» хампаанньа «Сыыппара экэниэмикэтэ. УЦН 2.0» федеральнай бырайыагынан Саха Сирин 14 нэһилиэгэр мобильнай сибээс баазовай ыстаансыйаларын үлэҕэ киллэриитин туһунан сонун.

9. «Гранулаламмыт от: Технологияны тутуһуҥ!». Ааптар Раиса Сибирякова, 5140 көрүү

Сонун. Убаһалар өлө сыталларын устубут видео тарҕаныытын, Таатта улууһун Кыйытыгар үс убаһа гранулаламмыт оту сиэн өлбүттэрин туһунан.

10. «Саха Сиригэр орто хамнас - 96 372, 5 солк.». Ааптар Марианна Тыртыкова, 5133 көрүү.

Сонун. Өрөспүүбүлүкэҕэ 2022 с. сэтинньитигэр ааҕыллыбыт орто хамнас 96 372, 5 солк., мантан 13% нолуогу көҕүрэтэбит, оччоҕо илиигэ ылар харчыҥ тахсар. Ол туһунан СӨ Судаарыстыбаннай статистикаҕа федеральнай сулууспатын саайтыгар тахсыбытын кэпсиир сонун.