Бу сылга «Ил Түмэн» хаһыат 25, саха парламена 30 үбүлүөйдээх сылларын туолар кэмнэригэр генеральнай дириэктэр-кылаабынай эрэдээктэр Мария Христофорова уонна шеф-эрэдээктэр Галина Бочкарева салайааччыллардаах хаһыаппыт ааҕааччыларга сокуон эйгэтигэр бастыҥ суолдьут буолуохтаах уонна өссө үрдүк кирбиилэргэ тиэрдиэхтээх. Оттон чуолаан парламент суруналыыһа – Ил Түмэн үлэтин сырдатарга, сокуон барылларын оҥоруу, бигэргэтии уустук хамсааһыннарын дьиҥнээхтик сырдатарга, ылыныллыбыт сокуоннары ааҕааччыларга чэпчэкитик быһаарарга сыралаахтык үлэлиэхтээх.
Быйылгы үбүлүөйдээх сыл үрдүк наҕараадаларынан саҕаланна. Саха Сиригэр аатырбыт суруналыыс, сүҥкэн кылааты киллэрбит Леонид Ирмович Левин аатынан анал бирииһи «Ил Түмэн» хаһыат нууччалыы таһаарыытын эдэр кэскиллээх кэрэспэдьиэнэ Лена Васильева тутта. Кини ордук парламент үлэтин-хамнаһын, социальнай уонна култуура эйгэтин сырдатар. Ыстатыйалара судаарыстыба, эрэгийиэн, олох-дьаһах проблемаларын таарыйар, дьон-сэргэ сэҥээриитин ылар. Санаттахха, бу бириэмийэни «Домострой. Якутск» сурунаал кылаабынай эрэдээктэрэ Лариса Владимирова төрүттээбитэ.
Ил Түмэн бэрэссэдээтэлин бастакы солбуйааччыта Александр Жирков илиититтэн Махтал суругунан «Ил Түмэн» хаһыат кэрэспэдьиэннэрэ Раиса Сибирякова, парламент сис кэмитиэттэрин Бочуоттаах грамоталарынан Марианна Тыртыкова, Раиса Никифорова, Ирина Романова наҕаарадалыннылар.
Оттон СӨ Инновацияҕа, сыыппара сайдыытыгар уонна информационнай технологияларга министиэристибэтин Бочуоттаах грамоталарын, Ил Түмэн кэмитиэттэрин Махтал суруктарын «Ил Түмэн» хаһыат кэрэспэдьиэннэрэ Ирина Романоваҕа уонна Василий Прокопьевка туттардылар.
Ону сэргэ Ил Түмэн бэрэссэдээтэлин бастакы солбуйааччы - Патриотическай иитии уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Александр Подголов парламент информационнай хааччыйыытын үлэтигэр айымньылаах кылаатын иһин «Ил Түмэн» хаһыат кэлэктиибин Махтал суругунан бэлиэтээтэ.
Өссө биирдэ биир идэлээхтэрбитин эҕэрдэлиибит уонна саҥа интэриэһинэй идиэйэлэри, бырайыактары, профессиональнай үүнүүнү, кытаанах доруобуйаны, үлэҕитигэр сайдыыны баҕарабыт. Айар талааҥҥыт, сытыы бөрүөҕүт сыппаабатын!
Бэриниилээх ааҕааччыларбытыгар үрдүк наҕараадалары чиэстээхтик толорон, «Ил Түмэн» хаһыат өссө тупсарын туһугар бары кыһамньыбытын ууруохпут диэн эрэннэрэбит.
-
6
-
0
-
0
-
0
-
0
-
0
