Уопсастыба

Ол чэрчитинэн улуус баһылыга Дмитрий Тихонов Хаптаҕайга тохсунньу 5 күнүгэр, Светлана уонна Ариан Назаровтар дьиэ кэргэннэригэр төрдүс оҕонон төрөөбүт уолчааҥҥа Бырабыыталыстыба аатыттан бэлэх сэртипикээти туттаран, соһуччу үөрүү буолла. Ыал ийэтэ Света («Дириҥ» кэпэрэтиип бухгалтера) оҕолорун көрөн олорор, аҕалара Ариан олохтоох ОДьКХ оператора. Бырабыыталастыба дьоһун бэлэҕи оҥорон, эдэр ыалга кэскиллээҕи түстүүр, былааны оҥостор кыаҕы биэрдэ.

2023 сыл – Дмитрий Тихонов улуус баһылыгынан үлэлээбитэ иккис сыла. Отчуоту истээри элбэх киһи мустубут. Баһылык отчуотун бары эйгэлэринэн араартаан, саас-сааһынан сыыппаралары холобурдаан оҥорбута улууска үлэ күүскэ барбытын, бара турарын итэҕэттэ. Олохтоохтор ыйытыыга да, санааны атастаһыыга да көхтөөхтүк кытыннылар. Ити сыл устата ыытыллыбыт үлэни суолталааҕынан ааҕан, түмүктэринэн астынан, кэлэр сыл барыллара сөптөөх суолунан барарыгар эрэнэллэрин көрдөрөр.

Хаптаҕай нэһилиэгин сиринэн үрдүк кыамталаах уот ситимэ, федеральнай айан суола, гаас утаҕа, тимир суол ааһалларынан, өссө сотору кэминэн улуу эбэни туоруур муоста тутуута саҕаланарынан, алмаас улахан саппааһа баара бигэргэтиллэн, кэлии-барыы эмиэ манан барыахтааҕын быһыытынан, нэһилиэк логистика киининэн буолара саарбаҕа суох. Мэҥэ Хаҥалас улууһа, Хаптаҕай нэһилиэгэ бүтүн Саха сирин сирэйэ буолар кэскиллээх. Ол да гыннар, нэһилиэккэ добуочча сааһырбыт мас оскуола хапытаалынай өрөмүөн өҥөтүнэн турара, култуура дьиэтэ олох да сууллаары ыксатан үлэлээбэккэ турара, эмп атыылыыр аптека суоҕа -- бу барыта киһи хомойор чахчылара. Саҥа оскуола тутуута былааҥҥа сылдьыбыта ырааппыт да, араас биричиинэлэринэн сыҕарытыллан иһэр.

Ыйытыкка, кэпсэтиигэ элбэх киһи кытынна: нэһилиэк дьокутааттара А.С. Кривошапкина, Н.Н. Попов, оскуола дириэктэрэ И.В. Кычкина уонна Е.Н. Лукина, Е.И. Федорова, Ф.Н. Дьячковскай, П.Е. Федоров, С.Ю. Федоров, П.Е. Терентьева. Кинилэр хамыыһыйа тэрийэн, былааннанар хамсааһынтан нэһилиэк экологиятын харыстыыр суолу эрдэттэн тобуларга ыҥырдылар. Тыа хаһаайыстыбатынан тэрилтэлэрэ үлэлэрин хайысхатын кэҥэтэргэ, күүһүрдэргэ эттилэр. Эминэн-томунан хааччыйар аптека, стоматология, оскуолаҕа репетитор киинэ аһыллара наадалааҕын, “Уһук Илиҥҥи гектар туһунан” сокуонунан сир учаастагын биэрии үлэтэ чуолкайданарын туруорустулар. Гаас турбата быйыл хаста да саахаллана сылдьыбыттарын санаттылар. Итинтэн да элбэх, итиннэ майгынныыр нэһилиэк сайдыытыгар туһалаах этиилэри киллэрдилэр. Хас биирдии ыйытыыгра улуус тустаах исписэлиистэрэ сиһилии хоруйдары биэрдилэр. Түмүгэр, олохтоохтор улуус баһылыгын үлэтин үчүгэйинэн сыаналаатылар.

Улуус баһылыга Дмитрий Тихонов, улуус дьокутааттарын сэбиэтин бэрэссэдээтэлэ Николай Андросов, Ил Түмэн дьокутаата Захар Никитин мустубут дьоҥҥо махталларын эттилэр. Маннык аһаҕас, дириҥ ырытыылаах нэһилиэнньэ уонна салалта мунньахтара ыытыллара сайдыы хаамыытыгар дьоһуннаах олук буолара саарбахтаммат.

Хаптаҕайтан Зинаида Игнатьева, Арассыыйа суруналыыстарын сойууһун чилиэнэ