Уран тарбахтаах норуот маастардара, култуура тэрилтэлэрин кэлэктииптэрин уонна култуурунай холбоһуктар бэрэстэбиитэллэрэ Саха Сиригэр олорор норуоттар ураты култуураларын көрдөрөр национальнай таҥастарын кэтэннэр, сэлэлии хаамыыга кытыннылар.
– Бу күннэргэ өрөспүүбүлүкэ үрдүнэн ураты күүрээннээх дьаһаллар: быыстапкалар, куонкурустар, бэстибээллэр тэриллэллэр. Олортон биир саамай кэтэһиилээхтэрэ национальнай көстүүмүнэн сэлэлээн хаамыы буолар. Быйылгы хаамыыга тыһыынчаттан тахса киһи кыттан, бэйэлэрин норуоттарын ураты култууратын көрдөрдүлэр. Өрөспүүбүлүкэ киин куоратыгар араас улуустартан уран тарбахтаах маастардар түмсэн, бэйэлэрин үлэлэрин көрдөрдүлэр. Биһиги маастардарбыт талааннара салгыы сайда турдун, саҥа көлүөнэлэри көҕүлээтин. Үлэлэрэ үйэлэргэ чэчирээтин, сүрэҕи Ийэ дойду иһин киэн туттуунан толордун! – диэн Ил Дархан Айсен Николаев бэйэтин телеграм-ханаалыгар суруйда.
Норуот маастардарын сэлэлээн хаамыылара Орджоникидзе болуоссатыттан саҕаланан, Өрөспүүбүлүкэ болуоссатыгар үгэс буолбут оһуокайынан түмүктэннэ.
Култуура уонна духуобунай сайдыы миниистирэ Афанасий Ноев эҕэрдэ тылыгар сэлэлээн хаамыы өрөспүүбүлүкэ култууратын барҕа баайын киэҥник сырдатыыга уонна харыстааһыҥҥа тирэх буоларын бэлиэтээтэ. Күн бүгүн 316 Саха Өрөспүүбүлүкэтин норуотун маастара, 726 Саха Өрөспүүбүлүкэтин уус-уран оҥоһуктарын маастардара баалларын, кинилэр кэккэлэрэ сыллата хаҥыырын эттэ.
Норуот маастарын күнэ өрөспүүбүлүкэҕэ 2012 сылтан саҕалаан, кулун тутар 5 күнүгэр бэлиэтэнэр. 2023 с. сэтинньи 1 күнүттэн сэттэ норуот маастарыгар Ил Дархан истипиэндийэтин биэрэр үгэс олохтоммута. Арассыыйа Федерациятын Бэрэсидьиэнэ Владимир Путин ыйааҕынан, 2022 сыл Арассыыйа норуоттарын култуураларын нэһилиэстибэлэрин сылынан биллэриллибитэ, бэс ыйын бүтэһик өрөбүлэ Норуот уус-уран оҥоһуктарын күнүнэн олохтоммута. Бу туһунан Ил Дархан уонна Бырабыыталыстыба пресс-сулууспата суруйар.
Саргын Скрябин (ЯСИА) хаартыскаҕа түһэриитэ.
-
1
-
0
-
0
-
0
-
0
-
0
