Уопсастыба

ОДьКХ тэрилтэлэригэр бүддьүөт субсидиятын ороскуотун намтатыы дьаһалларын былааннааһыҥҥа Бырабыыталыстыба биэдэмистибэлэр икки ардыларынааҕы сэттэ оробуочай бөлөҕө тэриллибитэ. Субсидия чопчуланара ирдэнэр аҕыйах киһи олорор нэһилиэнньэлээх пууннарын  кэрискэлэрэ оҥоһуллубута, онно Уус Алдан улууһуттан Курбуһах нэһилиэгин Балаҕаннаах, Лөгөй нэһилиэгин Далы, Бэрт ууһун нэһилиэгин Чирэпчи сэлиэнньэлэрэ киллэриллибиттэрэ. Улуус дьаһалтата бу боппуруоска улуус уонна нэһилиэктэр көрүүлэрин быһаарар суругу  Бырабыыталыстыбаҕа, Ил Түмэҥҥэ уонна норуот дьокутаата Александр Жирковка  киллэрбитэ.

Ил Түмэн Бэрэссэдээтэлин бастакы солбуйааччы Александр Жирков тэрийбит сүбэ мунньаҕар улуус баһылыгын э.т. Илья Артамонов, улуус дьокутааттарын Сэбиэтин бэрэссэдээтэлэ Иннокентий Аммосов, Курбуһах, Балаҕаннаах, Лөгөй нэһилиэктэрин баһылыктара Илья Ильин, Николай Попов, Владимир Петров, уопсастыбаннас бэрэстэбиитэллэрэ, нэһилиэктэр актыыптара кытыннылар. Бырабыыталыстыба оробуочай бөлөҕүн салайааччы, норуот дьокутаата Виктор Федоров ОДьКХ эйгэтигэр үөскээбит быһыыны-майгыны сиһилии быһааран биэрдэ. Кэлиҥҥи биэс сылга, 2018 сылтан 2025 сылга диэри, хомунаалынай хаһаайыстыба тэрилтэлэригэр тарыып араастаһыытын толуйууга көрүллэр субсидия 18 миллиартан 50 млрд солк харчыга тиийбитин, салгыы маннык бара турдаҕына, өрөспүүбүлүкэ бүддьүөтэ аҥардас хамнас төлөбүрүгэр уонна оттук, сылытыы ороскуотун эрэ толуйарга барыаҕа, ол охсуута улахан буолуоҕа, инньэ гынан ороскуоту аччатар сорук турар, ол иһигэр, 50 киһиэхэ диэри нэһилиэнньэлээх пууннары сабар боппуруос үөрэтиллэр диэтэ.

– Олохтоохтор сөбүлэҥнэрэ суох биир да нэһилиэнньэлээх пуун сабыллыа суоҕа, ол сокуонунан араҥҥаччыланар. Ити эрээри онон уоскуйан хаалбакка, тыа сирин дьоҕус сэлиэнньэлэрин чөл хаалларар кыахтары көрдүөххэ наада. Өрөспүүбүлүкэ салалтата ону өйдүүр, миэстэҕэ салайааччылар эмиэ өйдүүллэрэ эрэйиллэр. Эһигиттэн ороскуоту аччатыы атын, көдьүүстээх  хайысхаларын тобуларга, оттугу уонна электроуоту кэмчилиир технологиялары киллэриигэ этиилэри күүтэбит, – диэтэ Александр Жирков.

Мунньах кыттыылаахтара Балаҕаннаахха, Далыга уонна Чирэпчигэ төһө киһи олорорун чопчулуурга, оттукка, сылытыыга уонна сырдатыыга төһө харчы ороскуоттанарын өссө төгүл ааҕан-суоттаан көрөргө сүбэлэстилэр. Сэбиэскэй былаас сылларыгар Даалыга, Чирэпчигэ таһаарыылаахтык үлэлээбит-хамсаабыт  үүт-табаарынай пиэрмэлэригэр бастыҥ ыанньыксыттар Елизавета Ивановна Бурцева уонна Анастасия Семеновна Копырина чулуу көрдөрүүлэри ситиһэн, Социалистическай Үлэ Дьоруойун үрдүк аатынан бэлиэтэммиттэрин аҕыннылар, билигин даҕаны, үлэни-хамнаһы тэрийиэххэ сөбүн туһунан санаттылар. Сир саҥа кэм үлэһиттэрин кэтэһэр, харыны ньыппарыныахха эрэ наада дэстилэр.

Ил Түмэн пресс-сулууспатын матырыйаалынан.