Онон араас улуустартан бааһынай хаһаайыстыбалар эдэр баһылыктара уонна бэйэ дьыалатын арынан, үлэни-хамнаһы тэриниэхтэрин баҕарар ыччаттар, барыта 40 киһи мустан, үс күн устата тыа хаһаайыстыбатын күннээҕи үлэтигэр хайдах саҥа технологияны киллэрэр, ылыллар бородууксуйа кээмэйин элбэтэр, хаачыстыбатын үрдэтэр туһунан АГАТУ преподавателлэрин, Тыа хаһаайыстыбатын уонна ас-үөл бэлиитикэтин министиэристибэтин исписэлиистэрин лиэксийэлэрин иһиттилэр, уопут атастастылар.
Үөрэх түөрт хайысханан ыытылынна. Бастакы хайысха ынах сүөһүнү иитии, көрүү-истии, аһатыы технологиятыгар, иккис – боруоданы тупсарыыга, удьуор үүттээх, төрөлкөй төрүөхтээх ынахтары сүүмээрдэһиҥҥэ, үһүс -- сүөһүнү иитии көдьүүһүн үрдэтиигэ, төрдүс – биисинэс-быланы оҥорууга ананнылар. Түмүккэ ылбыт билиини чиҥэтэр дьыалабыай оонньуу тэрилиннэ. Кыайыылаах хамаанда чилиэннэригэр «Туймаада» агрохолдинг биирдии ньирэйи бэлэхтиирин туһунан иһитиннэрдэ.
Санатан эттэххэ, бу хампаанньа ынахтара үрдүк бородууксуйаны биэрэр боруодалар, онон маннык ньирэйдэр үлэлэрин саҕалыыр эдэр дьоҥҥо төһүү буолаллара саарбахтаммат. Бу туһунан Тыа хаһаайыстыбатын уонна ас-үөл бэлиитикэтин министиэристибэтин саайта суруйар.
Хаартыскалар Тыа хаһаайыстыбатын уонна ас-үөл бэлиитикэтин министиэристибэтин саайтыттан.
-
0
-
0
-
0
-
0
-
0
-
0
