Аартыкатааҕы эргиэн-логистика хампаанньата киинтэн ыраах сытар, мөлтөх суоллаах-иистээх 241 нэһилиэнньэлээх пууҥҥа аһы-үөлү быспакка хааччыйар. Быйылгы сыл бастакы кыбаарталыгар Дьааҥы уонна Муома улуустарыгар аныгы ирдэбилгэ эпиэттиир Эргиэн-логистика кииннэрэ аһыллан үлэлэрин саҕалаабыттара. Аны билигин Аллайыахаҕа, Эбээн Бытантайга уонна Өлөөҥҥө маннык кииннэр тутуллуохтара. Онно анаан 122 туонна матырыйаал тиэрдилиннэ, тутуу мантан саас саҕаланан, сыл бүтүүтүгэр эбийиэктэр үлэҕэ киллэриллиэхтээхтэр.
Ил Дархан Айсен Николаев аһы-үөлү быспакка уонна удамыр сыананан хааччыйарга итиэннэ олохтоох бородууксуйаны (эти, балыгы, сир аһын) соҕотуопкалыырга анаан Аартыка 13 улууһугар Эргиэн-логистика кииннэрин тутарга уонна олорго кииннээн эргиэн, соҕотуопка тиһигин тэрийэргэ сорудахтаабыта ити курдук олоххо киллэриллэр диэн Ил Дархан уонна Бырабыыталыстыба пресс-сулууспата иһитиннэрэр.
Хаартыска Ил Дархан уонна Бырабыыталыстыба саайтыттан.
-
0
-
0
-
0
-
0
-
0
-
0
