Чэгиэн-чэбдик доруобуйаны, дьиэ кэргэҥҥэр, оҕолоргор, сиэннэргэр, аймах-билэ дьоҥҥор этэҥҥэ буолууну, эйэлээх күөх халлааны, дьолу-соргуну уонна ситиһиини баҕарабыт.
«Ил Түмэн» издательскай дьиэ кэлэктиибэ.
Ыспыраапка: Иван Софронович идэтинэн тутааччы инженер. Сэбиэскэй тутул эстэн, дойду ырыынак сыһыаннаһыытыгар киирэр, хамнас ыйы ыйдаан кэлбэт саамай уустук кэмигэр, 1993 сыллаахтан Култуура министиэристибэтигэр тутуу салаатын салайбыта. Оччолорго тыа сиринээҕи култуура эбийиэктэрин 70 %-а эргэ этэ, 26 кулууп дьиэтэ сууллар туруктааҕынан сабыллан турара, аны ССРС ыһыллыбытын кэнниттэн хапытаалынай тутууну үбүлээһин тохтотуллубута. Инньэ гынан, төһө да үп-харчы кырыымчыгын, хамнас хастыы да ый хойутаан кэлэрин, сыана күннэтэ үрдүү турарын үрдүнэн, миниистир Андрей Борисов өйөбүлүнэн, Иван Емельянов улуустар дьаһалталара, култуура управлениелара хардарыта ахсаанынан, норуот хамсааһынынан уонна субуотунньугунан араас эбийиэктэри туталларын көҕүлээбитэ. Итинник ньыманан 2000 сылга диэри өрөспүүбүлүкэ улуустарыгар култуура эйгэтигэр 116 саҥа эбийиэк тутуллубута, ону таһынан эстибит сопхуостартан хаалбыт эбийиэктэринэн саҥардыллан, уларытыллан оҥоһуллубут 118 эбийиэк үлэҕэ киллэриллибитэ.
Икки үйэ алтыһар кирбиитигэр Мэҥэ Хаҥалас улууһун көҕүлээһининэн, Бэрэсидьиэн Михаил Николаев өйөбүлүнэн, «Үтүө дьыала» хамсааһын саҕаламмыта. Мэҥэлэр ол сыл «Улууспут 70 сылынан – 70 эбийиэги!» диэн ыҥырыыны таһааран, нэһилиэк ахсын араас эбийиэктэри туппуттара холобурга туруоруллубута. Михаил Николаев 1999 с., алтынньы 14 күнүгэр «Үтүө дьыала» хамсааһынын туһунан ыйааҕы таһаарбыта, онно олоҕуран, сэтинньи 18 күнүгэр «2000 сылга – 2000 үтүө дьыала» өрөспүүбүлүкэтээҕи хамсааһын биэдэмистибэлэр икки ардыларынааҕы толоруулаах дириэксийэтэ тэриллибитэ.
Иван Емельянов уопуттаах тутааччы, тэрийээччи быһыытынан сыаналанан, бу дириэксийэҕэ үлэлээбитэ. «Үтүө дьыала» хамсааһын дириэксийэтин бастакы салайааччыта Иннокентий Бочкарев 2002 с. улуус баһылыгынан талыллан барбытыгар, Иван Емельянов дириэксийэ салайааччынан ананан, 15 сыл үлэлээбитэ. Бу кэм устатыгар барыта 953 эбийиэк, ол иһигэр эдэр исписэлиистэргэ олорор дьиэлэр, тутуллан үлэҕэ киллэриллибиттэрэ.
«Мин Сахам Сирэ XXI үйэҕэ» үтүө дьыала хамсааһыҥҥа тирэҕирэн, улуустарга, чуолаан суола-ииһэ суох кытыы нэһилиэктэргэ үөрэхтээһин, култуура, успуорт эбийиэктэрэ тутуллубуттара, тутуллаллар. Ол иһигэр, Олоҥхо ыһыахтарын эбийиэктэрэ эмиэ бу хамсааһын чэрчитинэн оҥоһуллаллар. Бу барыта үүнэр сүһүөх ыччаттар төрүт үгэстэрин, култуураларын кыра саастарыттан иҥэринэ улааталларыгар, эт-хаан өттүнэн сайдыылаах дьон буолалларыгар ананар. Хамсааһын салалтатын муоһатын 2018 сылтан Андрей Петров тутан, бэрт таһаарыылаахтык үлэлии-хамсыы сылдьар.
Хаартыскалар Емельяновтар дьиэ кэргэн архыыптарыттан
-
2
-
1
-
0
-
0
-
0
-
0
