Уопсастыба

Үс үйэлээх, уһун уктаах саха баахылатын буһарар пуорма, туос иһиттэр араастара, хаһан оҥоһуу күрдьэх, саппыйаан ииччики этэрбэс, чокуур саа буораҕын угар тэрил, чүмэчи олоҕо, алтан харчылар, дьахтар алтан кура, солотуулаах чаанньык, мельхиор үрүүмпэ, сүктэр кыыс сарыы иннэлигэ, кириэс-сүрэх, ыҥыыр сирэйдэрэ, эрэпсиин, угаарка арааһа, олохтоох уус оҥорбут хомуһа кытта баар. Тэрээһин кыттыылаахтара сыа-сым курдук, кичэллээхтик уура сылдьар малларын дириҥ устуоруйаларын кэпсээбиттэриттэн элбэҕи биллибит-көрдүбүт.

Улахан маллары хаартыскаҕа түһэрэн кэлэн иһитиннэрбиттэрэ саҥа үйэ тэтимигэр олус барсар. Ол курдук, былыргы сундуук, мас ыскамыайкалар, ыскааптар, билигин аатырар “Икеа” бренд буолбут фирма миэбэлиттэн итэҕэһэ суохтарын сөҕөҕүн. Ааспыт үйэҕэ туттуллубут алюминий ньуоскалар, биилкэлэр, чороон быһыылаах вазалар кырдьык даҕаны киһи олоҕун устуоруйатын кытта ыкса сибээстээхтэр. Холобур, Иванов Василий Николаевич –Һахаачча эһээ оҥорбут маллара элбэх ыалга күн бүгүнүгэр диэри туттулла сылдьаллар. Өссө хомус оҥорбут эбит, хос сиэнэ Тимоша Васильев ол хомуска хаа оҥорбут, оҕобут хос эһэтин туйаҕын хатаран уус буолан тахсыаҕа.

Ыал буоларга дьонноро бэлэхтээбит эспэнээттэр араастара элбэх, ол курдук, таба кулгааҕын төгүрүтэн атанан, тыс сыыһынан төгүрүччү тикпит көбүөрдэрэ, 60 сыллааҕыта тигилиббит быысапка, холустаҕа уруһуйдаммыт хартыына, чэрэниилэ кутар иһит, суруйар бөрүө, халадаайдаах былааччыйа... Устудьуоннар тэтэрээттэрэ, буочардара ырааһын, тэбис-тэҥин көрөн биһирээтибит.

Кирбэйгэ Түмэл күнэ олус дириҥ ис хоһоонноохтук тэриллэр буолан сылтан сыл кыттааччы ахсаана элбээн иһэр. Түгэнинэн туһанан көлүөнэни ситимниир туһугар маннык көрсүһүүлэргэ оҕолору кытыннарыахха диэн этиибин киллэрэбин, билигин көс олохтон тэйэммит, туттар малларбыт ааттарын умнан эрэбит, оҕолорбут олох сыаннастарын интэриэһиргээбэт буоллулар. Сэдэх эспэнээттэри көрдөрбүттэр түмэл Махтал суругун туттубут. Бу дьаһалы тэрийбит  Клара Васильевна Кирилловаҕа, Христофор Павлович Васильевка ааспыт олох аанын сэгэтэн, билбэтэхпитин билиһиннэрбиттэригэр, көрбөтөхпүтүн көрдөрбүттэригэр, устуоруйа дьоро киэһэтигэр ыалдьыттаан ааспыппытыгар махтанабыт. Өбүгэ малын-салын кэриэс гынан уура, харайа сылдьыы, бу – эбэҥки норуотун духуобунай сыаннастарыгар сүгүрүйүү, убаастабыл бэлиэтэ буолар.