Ил Түмэн Бэрэссэдээтэлин бастакы солбуйааччы Александр Жирков бу пуоруму сүрүн тэрийээччи, Судаарыстыбаннай Дуума дьокутаата, Айылҕа харыстабылын министиэристибэтин иһинэн үлэлиир Ураты харыстанар сирдэр эспиэртэрин сэбиэтин баһылыга Николай Валуев салайар «“Экология” айылҕа харыстабылын көҕүлээһиннэрин өйүүр киин» кэммиэрчэскэйэ суох аптаныамынай тэрилтэ Уопсастыбаннай сэбиэтин чилиэнэ.
Александр Николаевич Саха сирин уонна бүтүн Сибиир айылҕатын араҥаччылыырга туһуламмыт үс боппуруоһу көтөхтө:
1. Обь, Енисей, Өлүөнэ, Амур өрүстэри уонна кинилэр салааларын араҥаччылыырга туһуламмыт «Сибиир улуу өрүстэрэ» национальнай бырайыагы сөргүтүү. Санатан эттэххэ, ааспыт өттүгэр Саха Өрөспүүбүлүкэтэ Өлүөнэни харыстыыр бырайыагы туруорса сылдьыбыта да, өйөбүлү ылбатаҕа. Александр Жирков соҕотох биир өрүс болҕомтоҕо ылыллыа суоҕа диэн, Сибиир түөрт улуу өрүһүн бары салааларын киллэрэн туран араҥаччылыыр федеральнай бырайыагы оҥорорго туруоруста.
2. Ирбэт тоҥу харыстыырга, табатык туһанарга анаммыт кэлим бырагырааманы, сокуон тиһигин оҥоруу. Ирбэт тоҥ уларыйыыта бүтүн Аан дойду айылҕата уларыйыытын кытары ситимнээҕин этэн туран, Александр Жирков бу эйгэҕэ ыытыллар бырайыактары, үлэлэри түмэргэ, Аан дойду таһымыгар бииргэ үлэлээһини күүһүрдэргэ эттэ.
Бу боппуруостар Владимир Путин Федеральнай Мунньахха Туһаайан этиитигэр ыйыллыбыттара уонна 2030 с. диэри Экология хайысхатынан ыытыллар үлэ стратегиятыгар киирбиттэрэ.
3. Аартыкаҕа уонна Хотугу сирдэргэ сир баайын хостооһун, саҥа сирдэри туһаҕа таһаарыы күүһүрбүтүнэн, бырамыысыланнай тэрилтэлэр үлэлэрин бэрээдэктиир, кинилэр социальнай эппиэтинэстэрин сокуонунан бигэргэтэр, олохтоох бүддьүөккэ көмөлөрүн улаатыннарар ирдэнэр.
-- Бу туһунан кэпсэтии элбэх эрээри, билиҥҥитэ сир баайын хостуур тэрилтэлэр сиргэ-уокка сыһыаннарын бэрээдэктиир дьаһал ылылла илик. Арассыыйа тулалыыр эйгэҕэ сыһыанын, айылҕаны харыстыыр үлэтин сүнньүнэн экологияҕа сыһыаннаах нацбырайыактарынан ыытар. Билиҥҥи тыҥааһыннаах кэмҥэ балыйа-балыйа, ирбэт тоҥмутун уонна уйан айылҕабытын утары харса суох быһыыланнахпытына, өр сыллаах харыстаһар үлэлэргэ кыттыспатахпытына, кэлэр көлүөнэҕэ өҥнөнөрбүт суох буолуоҕа, – диэтэ Ил Түмэн бастакы вице-спикерэ.
Хаартыскалар: Ил Түмэн саайтыттан
-
3
-
0
-
0
-
0
-
0
-
1
