Бу иннинэ ардаҕынан, тыалынан халлааммыт уларыйа турбут буоллаҕына, бүгүн күммүт сарсыардаттан үбүлүөйдээх ыһыаҕы уруйдаан, күн-дьыл тупсан биэрдэ. Сарсыардаттан түһүлгэҕэ норуот хотоҕостуу муһунна, биир да аһаҕас миэстэ тахсыбата.
Дьокуускайтан официальнай делегацияҕа Саха Өрөспүүбүлүкэтин Бырабыытыластыбатын Бэрэссэдээтэлин солбуйааччы, үбүлүөйдээх ыһыах хамыһыыйатын бэрэссэдээтэлэ Сергей Местников, Ил Түмэн Бэрэссэдээтэлэ Алексей Еремеев, «Арктик-капитал» хампаанньа генеральнай дириэктэрэ Матвей Евсеев, Ил Түмэн дьокутааттара, урукку сылларга үлэлээбит Сунтаар улууһун баһылыктара, народнай суруйааччы Сайа, улуу Сибиэрэп төрөппүт оҕолоро В.С.Иванова, Т.С.Зверев о.д.а. кэлбиттэр.
Ыһыах аһыллыытын улуус баһылыга Анатолий Григорьев Дуоҕа тутан биллэрээтин кытта, сүүһүнэн үҥкүүһүттэр Сибиэрэп аатырбыт «Оһуор үҥкүүтүн» толоруунан бар дьону астыннардылар.
Ыһыах аһыллыытын сиэрин-туомун биллиилээх режиссер, Сунтаардааҕы музыкальнай ускуустуба оскуолатын дириэктэрэ А.К.Степанов сценарийынан үрдүк таһымнаахтык ыытта. Ыһыах алгыһын Дархан этээччи,алгысчыт Михиал Евсеев-Кураһаай Мюхээлэ Үрүҥ Аар Тойон баһылыктаах Аар Айыыларга, сирдээҕи үтүө иччилэргэ сүгүрүйэн ыытан, амылыйда.
Хаартыска: Марта Николаева, Галина Бочкарева түһэриилэрэ
-
2
-
0
-
0
-
0
-
0
-
1
