Кырачаан иитиллээччилэри бэйэлэрин үлэлэригэр бэриниилээх учууталлар, иитээччилэр көрсүбүттэрэ. Дириэктэринэн РФ үтүөлээх учуутала, «Бочуот знага» уордьаннаах Любовь Егорова үлэлиирэ. Улуу Куоркун кыһатыгар үөрэнэн, интэринээт олоҕор доҕордуу сыһыаҥҥа иитиллэн, сөбүлүүр идэлэригэр салгыы үөрэнэн, күн бүгүн олоххо бэйэлэрин суолларын булбут дьоһуннаахай дьон махталларын бэлиэтин биллэрэн, оскуоланы бүтэрбиттэрэ 20 сылыгар түмүстүлэр. Кинилэр алын сүһүөх кылааска Анна Спиридоноваҕа, Алена Петроваҕа, Валентина Пермяковаҕа үөрэммиттэрэ, тохсус кылаастан хайысхаларын үс кылааска хайдыбыттара.
Спортивнай кылаас
Бу кылааска тустууну, сүүрүүнү өрө туппут, кыра эрдэхтэриттэн тустууга, сүүрүүгэ ситиһиилэммит оҕолор үрдүк таһымнаах тренердэрэ уһуйуллубуттара. Киэн тутта ааттыыбыт: тустууга СӨ үтүөлээх тренердэрин Игнат Сысолятины, Егор Аржакову, Михаил Скрябины уо.д.а., сүүрүүгэ Гавриил Нохтунскайы, дуобакка РФ үтүөлээх тренердэрин Мария Бырдыннырованы, Николай Кычкины, Николай Кычкин 2, цирковой ускуустабаҕа уһуйбыт Дмитрий Чаҕааны уо.д.а. Бу кылаас салайааччытынан химия учуутала Агафья Макарова, иитээччинэн Дария Барабанская үлэлээбиттэрэ. Кинилэр сатабыллаах салайыыларынан оҕолор биир тыыҥҥа иитиллэн, успуорка бииртэн биир ситиһиилэри ылбыттара.
Бу кылаастан иитиллэн тахсыбыттара: СӨ хапсаҕайга спорт маастара, тустууга саха норуотун спортивнай оонньууларын икки төгүллээх чемпиона, ММА байыаһа, Таатта улууһун бочуоттаах олохтооҕо Игнат Андросов (киниэхэ быйыл Тааттаҕа ыытыллыбыт XXII “Манчаары оонньууларын” аһыллыытын уотун уматар чиэс тиксибитэ); ыстаҥаҕа СӨ спордун маастара, “Дыгын оонньууларын” боотура (2014 с.) Петр Старостин; Анал байыаннай дьайыы бэтэрээнэ, “Эр санааланыы” уордьан кавалера, краповай берет хаһаайына Рустам Машарипов, көҥүл тустууга Арассыыйа икки төгүллээх чемпиона, призера Тимур Пестерев, Россия спордун маастара Ньургун Давыдов.
Гуманитарнай кылаас
Бу кылааска тылга дьоҕурдаах, ыллыыр-туойар, волейбол, дуобат, ох саа дьарыктарыгар уһуйуллар оҕолор үөрэммиттэрэ. Кылаас салайааччыларынан Саргылаана Кривошапкина, иитээччинэн Татьяна Спиридонова үлэлээбиттэрэ. Кылаас оҕолоро оскуола ыытыллар дьаһалларыгар көхтөөхтүк кытталлара. Ырыаны кыра эрдэҕиттэн доҕор оҥостон ыллаабыт, элбэх ырыа күрэҕэр кыттар Айта Дьячковская дьон-сэргэ астынар ырыаһыта буолла, билигин Чурапчы улууһун култууратын биир бастыҥ үлэһитэ. Аина Васильева-Анемподистова араас истииллээх таҥаһы айан таһаарар ураты дизайнер-иистэнньэҥ.
Ситиһиилээх дуобатчыттар элбэхтэр. Кинилэртэн дуобакка норуоттар икки ардыларынааҕы гроссмейстер, маастар, Аан дойду чемпионатын кыттыылааҕа, нуучча уонна международнай дуобат оонньууларын баһылаабыт Наталья Шестакова, сахалартан маҥнайгынан ох саанан ытыыга норуоттар икки ардыларнааҕы кылаастаах спорт маастара, Арассыыйа 2015 с.чемпиона, СӨ физическай култуураҕа уонна спортка туйгуна, ох саанан ытыыга өрөспүүбүлүкэ сүрүн тренерэ Михаил Филатов, дуобакка спорт маастарыгар кандидат Саина Михайлова бааллар. Дуобакка маастарга кандидат уолбут Саша Неустроевы ахтан-санаан ааһабыт.
Политехническай кылаас
Бу кылааска математика, физика, черчение предметтэрин дириҥэтэн үөрэппиттэрэ. Бары даҕаны үөрэххэ-билиигэ дьоҕурдаах этилэр. Элбэх оҕо чинчийэр үлэҕэ ылсан улуустааҕы, өрөспүүбүлүкэтээҕи НПК-ларга, предметнай олимпиадаларга кыттыбыттара. Оскуоланы 100 % хаачыстыбанан бүтэрбиттэрэ, 100 % үрдүк үөрэххэ киирбиттэрэ, бүтэрбиттэрэ. Оскуоланы сэттэ оҕо мэтээлинэн, ол иһигэр, Саргы Захарова, Саша Эверстов кыһыл көмүс, Аина Абрамова, Клара Егорова, Игорь Кожуров, Майя Сибирякова, Марина Федорова үрүҥ көмүс мэтээллэринэн бүтэрбиттэрэ. Спортивнай ситиһиилээх оҕолор эмиэ элбэхтэр. Кинилэртэн дуобакка кандидат Саша Федоров.
Кылаас салайааччытынан СӨ үтүөлээх учуутала Людмила Винокурова, иитээччинэн Лариса Неустроева үлэлээбиттэрэ, физикаҕа СӨ үтүөлээх учуутала Гавриил Яковлев, математикаҕа Мария Ноговицына, Людмила Спиридонова, черчениеҕа Анна Макарова үөрэппиттэрэ. Бу оҕолор ортолоругар энергетиктар, МЧС, электромеханиктар, хайа дьыалатын исписэлиистэрэ, тутааччылар, финансистар, экономистар, үөрэҕирии, спорт, култуура, медицина, о.д.а. эйгэтин үлэһиттэрэ бааллар, норуот наадыйар идэлэрин талан туһалаах дьон буоллулар.
Махтанабыт оскуолабытыгар, учууталларбытыгар, иитээччилэрбитигэр!
Көрсүһүү саҥа тутуллубут оскуолаҕа буолла. Оҕолор эрдэттэн бэлэмнэнэн үрдүк таһымнаахтык тэрийдилэр. Улуу тренер Д.П. Коркин музейыгар бэртээхэй стеллажтары бэлэхтээтилэр. Бу мүнүүтэ долгутуулаах түгэннэрэ кинилэри киһи быһыытынан үрдүктүк сыаналатта. Бу интэринээт-оскуолаҕа сөпкө иитиллэн, үөрэнэн киһи-хара буолбут махталларын бигэргэттилэр. Ыытааччылар Айта, Инга бэрт сэргэхтик ыыттылар. Ырыаһыттарбыт Айта, Клара, Сайыына кэрэ ырыаларын бэлэхтээтилэр. Үөрэнээччилэрбит улаата, идэлэнэ охсон, биллэр-көстөр үлэһит буолбуттарын хайгыы көрдүбүт. Инга Игнатьева (Данилова) докумуонунан көмөтүнэн, улуус дьокутаата Дмитрий Захаров туруорсуутунан, Людмила Винокуроваҕа “Чурапчы улууһун үөрэҕин систиэмэтигэр кылаатын иһин”, Агафия Макароваҕа “Чурапчы улууһугар физкультура уонна спорт сайдыытыгар кылаатын иһин”, Дария Барабанскаяҕа “Чурапчы улууһугар үөрэх сайдыытыгар кылаатын иһин”, Анна Спиридоноваҕа, Алена Петроваҕа “Моя первая учительница” бэлиэлэри туттардылар. Оҕо иитиитигэр өр сыллаах үлэлэрин иһин Чурапчы улууһун үөрэҕириитин салаатыттан Бочуотунай Грамоталары Саргылаана Кривошапкинаҕа, Татьяна Спиридоноваҕа, оскуола-интернат администрациятын Махтал суругун Лариса Аввакумоваҕа туттарда.
Биир долгутуулаах түгэнинэн политехкылаастар учууталларга, иитээччилэргэ кинигэ бэлэхтээбиттэрэ буолла. Клара Захарова, Саргылаана Степанова биргэ үөрэммиттэриттэн ахтыы хомуйан, бэрт сонун, креативнайдык таҥыллыбыт кинигэлэригэр оскуола олоҕун, үөрэппит учууталларын, иитээччилэрин тустарынан суруллубуту, ама, ким долгуйбакка ааҕыай? Бу аан аһыллыыта кинигэ, аны биэс сылынан бүтүн 39-с выпуск кинигэтэ буолар баҕа санааны барыбытыгар киллэрдэ! Бу курдук эҕэрдэ ырыалаах-тойуктаах, истиҥ эҕэрдэлээх торжественнай чаас түмүктэннэ. Бары бииргэ умнуллубат хаартыскаҕа түстүбүт, үөрэммит, үлэлээбит оскуолабыт “Куоркун буочара” гимнин долгуйан туран ыллаатыбыт.
Минньигэс астаах рестораҥҥа
“Итии ас -- итии сыһыан” диэбиккэ дылы, үөрэнээччилэрбит барахсаттар амтаннаах ас арааһын сакаастаан, кылааһынан тахсан бары эҕэрдэлээн үөртүлэр-көтүттүлэр, учууталларыгар, иитээччилэргэ сибэкки дьөрбөтүн, сыаналаах бэлэхтэри туттардылар. Бары даҕаны үтүө турукка киирэн, биир ситимҥэ буолан ааспыты ахтыһан, иһирэхтик кэпсэтэн араҕыстыбыт. Саха норуотун аан дойду таһымыгар таһаарбыт улуу Куоркун баар буолан, кини аатынан интэринээт-оскуола өрөспүүбүлүкэ оҕолорун хомуйан, спортка дьарыктыыра, киһи быһыытынан иитэрэ, үөрэхтээх каадыры бэлэмнээн, бу бүгүҥҥү курдук махталлаах үөрэнээччилэри хомуйара улахан оруоллааҕын мин учуутал, иитээччи буоламмын өссө биирдэ бигэтик өйдөөтүм.
Махтал буоллун, иитиллибит кыһаларыгар, учууталларыгар, иитээччилэригэр махтанар бүгүҥҥү выпускниктарга, махтал буоллун ийэлии истиҥ сыһыаннаах иитээччилэргэ, үөрэппит учууталларга, салайааччыларга.
Лариса Аввакумова, Арассыыйа Суруналыыстарын сойууһун чилиэнэ, М.Е.Николаев аатынан “Билиигинэн кыайыаҥ” пуонда лауреата
-
3
-
0
-
0
-
0
-
0
-
0
