Ол иһин куорат күнүгэр икки күн устата, Саха Сирин офтальмологическай сулууспата тэриллибитэ 100 сылыгар анаммыт харах туругун бэрэбиэркэлиир дьаарбаҥкаҕа сүүһүнэн киһи муһунна. Өрөспүүбүлүкэ болуоссатыгар дьон хас да чаас уочараттаан, ардахтан да куоппакка биир сиргэ туран, харах бырааһыгар көрдөрөр чиэскэ тигистилэр.
Балаакка иһигэр уончалыы быраас харах туругун, дабылыанньатын, ырааҕы-чугаһы хайдах көрөрүн, ис түгэҕин анал аппараатынан чинчийдилэр. Дьаарбаҥкаҕа улахан аҥаардара аҕам саастаах дьон кэллилэр, кинилэр уочараттарын ыскамыайкаҕа олорон кэтэстилэр.
«Уочараппытыгар инники-кэнники биэс киһини биэс тарбахпыт курдук билэбит. Кими да быһа киллэримэҥ», — дэһэллэр кинилэр.
Кэлиҥҥи кэмҥэ өрөспүүбүлүкэ офтальмологтара тустаах балыыһаҕа эрэ буолбакка, ыраах улуустары кэрийэ сыдьан, Донбасска тиийэ мэдиссиинискэй көмөнү оҥороллор.
«Бастакы күнүгэр дьаарбаҥка 14 ч. саҕаланар эрээри, дьон күнүс 12 ч. кэлэн уочараттаабыттара. Уон быраас, уон мэдиссиинискэй сиэстирэ баар буолан, уочарат түргэнник сыҕарыйан иһиэ.
Манна кэлбит дьон харахтара төһө сытыытык көрөрүн билиэхтэрэ, харах иһинээҕи дабылыанньаны чинчийиэхтэрэ, онтон офтальмолог быраас лаампанан харах түгэҕин көрүөҕэ. Салгыы олорор сиргинэн хараҕы кэтээн көрөргө сүбэлиэҕэ, эбэтэр хирургическай көмө наада буолар түгэнигэр толуон биэриэҕэ. Былаан быһыытынан биир күн иһигэр 300-400 киһини көрүөхпүт.
Ити курдук аахсыйа мэдиссиинискэй көмө элбэх киһиэхэ тиийэрин туһугар ыытыллар. Аныгы дьон көмпүүтэргэ олорон эрэ үлэлиир, аҕыйахтык хамсанар, бу барыта көрөр уоргаҥҥа эмиэ дьайар», — диэн этэр өрөспүүбүлүкэтээҕи офтальмологическай балыыһа кылаабынай бырааһа, Ил Түмэн дьокутаата Иван Луцкан.
Ил Дархан Айсен Николаев өйөбүлүнэн офтальмологтар икки массыынаҕа маннык тэрээһиннэргэ туттуллар, көһө сылдьар высокотехнологичнай оборудованиены: оптическай томограбы, УЗИ-ны илдьэ сылдьаллар.
Саха Сирин офтальмологическай сулууспата тэриллибитэ 100 сылыгар сайын научнай-практическай кэмпириэнсийэ ыытыллыбыта, быраастар тиһигин быспакка ыраах-чугас командировкаҕа сылдьан, дьон хараҕа көрөрүн туһугар бэриниилээхтик үлэлииллэр.
Ааптар хаартыскаҕа түһэриитэ.
-
0
-
0
-
0
-
0
-
0
-
0
