Арассыыйа бырабыыталыстыбатын дьаһалынан бигэргэммит 2036 сылга диэри дойду тырааныспарын, энэргиэтикэтин, сибээс уонна социальнай инфраструктуратын сайыннарыы былааныгар ураты болҕомто уурулунна диэн Айсен Сергеевич бэлиэтээтэ. Манна 280 бырайыак киирбититтэн, 21-рэ биһиги өрөспүүбүлүкэбитигэр сыһыаннаах. Мииринэй, Удачнай, Маҥан, Ньурба, Зырянка уонна Өлүөхүмэ аэропордарын саҥардыы, стратегическай суолталаах «Халыма» айан суолун, Өлүөнэ өрүһү туоруур муостаны, ону тэҥэ үс улахан энэргиэтикэ эбийиэгин — Новоленскай ТЭС, «Южно- -Якутскай» уонна «Нерюнгринскэй» ТЭС-тэри тутуу бырайыактара бааллар диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.
Аартыка сайдыытыгар ураты болҕомто уурулларын бэлиэтээтилэр. Саха Сирэ көҕүлээбит «Аартыка Синергията» бырайыагы олоххо киллэрии чэрчитинэн, былааҥҥа Чиэрискэй, Тиксии, Чокурдаах, Депутатскай, Баатаҕай уонна да атын Аартыка сиригэр-уотугар оптоволоконнай сибээс лиинийэлэрин тутуу 10 бырайыага киирдэ. «Ол түмүгэр хотугу улуустарга сыыппара тиһигин үөскэтиэҕэ уонна олохтоохтор ыраах сытартан тутулуга суох аныгы таһымҥа үөрэҕи, доруобуйа харыстабылын уонна урбаан өҥөлөрүн ылалларыгар кыах биэриэҕэ», — диэн эрэгийиэн баһылыга тоһоҕолоон бэлиэтээтэ.
Мунньахха 2035 сылга диэри гаас мотуордаах уматык ырыынагын сайыннарыы Концепциятын ырыттылар. Докумуоҥҥа этиллэринэн, тырааныспар уонна анал тиэхиньикэу уматык экологияҕа сөптөөх көрүҥнэригэр көһүүтэ үөрэтиллэр, ол айылҕа ноҕоруускатын намтатыаҕа уонна биисинэс сайдыытыгар саҥа кыаҕы үөскэтиэҕэ.
Ону таһынан, сыыппара эйгэтэ сайдыытын, ититии сезона саҕаламмытын, сүөһү аһылыгын бэлэмнээһини, буолаары турар успуорт уонна патриотическай тэрээһиннэригэр кыттыыны дьүүллэстилэр.
Ил Дархан уонна Бырабыыталыстыба пресс-сулууспата
Хаартыскаҕа Саргын Скрябин түһэриитэ.
-
0
-
0
-
0
-
0
-
0
-
0
