Пуорум түмүктэнээтин кытта анал исписэлиистэр уустук харайыы, тиэйии үлэтин ыытаннар, илин өттө 110 киилэ, кэлин өттө 80 киилэ курдук ыйааһыннаах эттиги анал сакаастаммыт рефрежираторга (-18-20 температураны тутар) уган массыынанан илдьибиттэрэ уонна аҕаллылар. ХИФУ Мамонт түмэлин лабораториятын сэбиэдиссэйэ Максим Чепрасов бэлитээбитинэн, "Селигдар" хампаанньа көмөтүнэн Янаны- сыаналаах палеонтология булумньутун аан дойду улахан түһүлгэтигэр бастакытын дьон билиитигэр-көрүүтүгэр таһаарбыттар уонна эттик салгыы харыстанарын толору хааччыйбыттар.
Билигин дойдутугар төттөрү аҕалыллыбыт мамонт оҕотун ХИФУ Мамонт түмэлигэр баар тоҥорор хаамыраҕа харайаллар. Учуонайдар инникитин булумньуну Дьокуускайга уонна Арассыйа атын да куораттарыгар, омук сиригэр да көрдөрүүгэ туруоруллуон сөбүн үөрэтэллэр. Яна бу пуорумҥа Уһук Илин уулуссатыгар Саха Сирин павильонугар көрдөрүүгэ туруоруллубута уонна ыалдьыттар бары көрө сатыыр сенсацияларынан буолбута. Эспиэртэр быһааралларынан, Яна бу иннинэ булуллубут былыргы палеонтология булумньуларыттан этэ-сиинэ ордук харыстаммытынан биллэр. Ол курдук, төбөтө, хуобата, кулгааҕа, айаҕа уонна хараҕын онно хайдах баарынан хараммыт. Ону таһынан куттаҕын, оһоҕоһун, сүрэҕин уонна тыҥатын булбуттар. Эттик уопсай ыйааһына 180 киилэ.
Максим Чепраков этэринэн, Саха Сирин ирбэт тоҥугар тыһыынчанан сылларга харыстанан сыппыт палеонтология тугунан да сыаналаммат булумньутун аан дойду киэҥ көрүүтүгэр таһаарыы биһиги өрөспүүбүлүкэбит билим өттүнэн өссө да киэҥ арыйыылардаах буолуоҕун уонна биһиги өрөспүүбүлүкэбит сирэ-уота аан дойдуга мамонт фауната харыстанан сытар сиринэн буоларын өссө төгүл көрдөрдө. Биллэрин курдук, бу пуорумҥа Саха Сириттэн өссө хаспах хахайын оҕолорун Борис уонна Спарта эттиктэрин көрдөрүүгэ туруорбуттара. Кинилэри 2019 сыллаахха Абый улууһун сиригэр-уотугар булбуттара.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата
-
2
-
0
-
0
-
0
-
0
-
1
