Уһук Илин эрэгийиэннэрин сокуону оҥорор судаарыстыбаннай былааһын бэрэстэбиитэллэрэ федеральнай былааска кыттыгас этиилэрин көрдүлэр.
Уочараттаах Уопсай мунньахха Алексей Еремеев РФ Бырабыыталыстыбатыгар элбэх оҕолоох ыаллар ипэтиэкэҕэ кирэдьииттэрин толуйууга 1 мөл. солк. көрүллэр Уһук Илин эрэгийиэннэрин испииһэгин кэҥэтэн, Саха Сирин, Бүрээтийэ уонна Забайкальскай кыраай элбэх оҕолоох ыалларын киллэрэр туһунан этии оҥордо.
Санатар буоллахха, 2024 сыл балаҕан ыйыгар Благовещенскайга ыытыллыбыт Ассоциация уочараттаах Уопсай мунньаҕар Ил Түмэн бэрэссэдээтэлэ Алексей Еремеев, Уһук Хоту тыйыс усулуобуйатыгар электроэниэргийэ ырыынактааҕы тарыыба олус үрдүгүнэн бу боппуруоһу федеральнай былаас уорганнарыгар туруорсуу наадалаах диэн этии киллэрбитэ. “Биһиги өрөспүүбүлүкэбитигэр тарыып боппуруоһа сүрүн суолталаах. 2028 сыллаахха Уһук Илин эрэгийиэннэрэ экэнэмиичэскэй өртүнэн сөптөөх тарыыпка көһүөхтээхтэр, оччотугар тарыыптар араастаһыыларын сабар субсидиялааһын мэхэньиисимэ тохтуохтаах. Эрэгийиэннэр бүддьүөттэрэ итинник уларытыыга бэлэмнэрэ суох. Ол иһин, бу РФ Бырабыыталыстыбатыгар субсидиялааһын мэхэньиисимин уһатарга анал кэлим комплекснай быһаарыыны оҥорор наада”, - диэн Ыҥырыы тахсарын көҕүлээбитэ. Салгыы бу этии РФ Бырабыыталыстыбатын көрүүтүгэр киллэрэн, сөптөөх быһаарыы ылыммыттара.
Ону таһынан, Уһук Илин парламентарийдара Уопсай мунньахха хас да этиини дьүүллэһии, үөрэтии түмүгүнэн РФ Бырабыыталыстыбытыгар туһаайыллыбыт анал боппуруостары : уопсастыбаннай аһылык тэрилтэлэрин тииптэрин уонна кылаастарын быһаарыыга РФ национальнай ыстандаартарын эбэтэр чопчу ыстандаарт сигэтин туттуу; тыа хаһаайыстыбатын дьоҕус тэрилтэлэригэр судаарыстыбаннай өйөөһүн миэрэлэрин ситэрэн биэрии; “Земскэй полиция боломуочуйалаах учаскуобайа” бырагырааманы бигэргэтии; Анал байыаннай дьайыы кыттыылаахтарыгар чэчпчэтиилээх ипэтиэкэ усулуобуйатын тупсарыы; бастакы группа инбэлиттээх АБДь кыттыылааҕын көрүү-харайыы иһин надбавканы улаатыннарыы; “Дьиэ кэргэн ипэтиэкэтэ” бырагыраама усулуобуйатын уларытыы; “Уһук Илин уонна Аартыка ипэтиэкэтэ” бырагырааманан кирэдьиити биэрии усулуобуйатыгар уларытыылары киллэрии; кыраасданнары аварийнай туруктаах олорор дьиэлэртэн көһөрүүгэ федеральнай уо.д.а бүддьүөттэн үбүлээһин усулуобуйаларын уонна кээмэйин уларытыы курдуктары салгыы үлэлэһэргэ сөбүлэстилэр .
Бу тэрээһин кэмигэр Саха Өрөспүүбүлүкэтин Судаарыстыбаннай Мунньаҕын (Ил Түмэн) уонна Хабаровскай кыраай Законодательнай Дууматын икки ардыларыгар парламеннар бииргэ үлэлэлээһи туһунан Сөбүлэһии түһэристилэр.
РФ судаарыстыбаннай былааһын уорганнарыгар киирбит этиилэр уонна ыҥырыылар бу мунньахха бигэргэнэн, салгыы Москубаҕа ыытарга сорудахтанна. Бу парламент Ассоциациятыгар 11 эрэгийиэн бэрэстэбиитэллээх сокуону оҥорор уорганнара киирэрэллэрин санатыахха сөп.
Хаартыска Ил Түмэн пресс-сулууспатыттан
-
0
-
0
-
0
-
0
-
0
-
0
