Төрөппүттэр, эбээлэр-эһээлэр хаппыысталаах, эттээх, дьаабылыкалаах бөрүөк, салаат, бурдук ас арааһын аҕалан, остуолга итии чэйдээх самабаар туруоран, мүөттээх блинынан, алаадьынан, халаачыгынан бар дьону күндүлээтилэр.
Ким баҕалаах дьаарбаҥкаҕа кэлэн, барыанньа, оҕуруот аһыттан кэнсиэрбэлэммит ас эгэлгэтин атыыластылар. Учууталлар этэллэринэн, сорох кылаастар атыылара табыллан, аны саас выпускной банкеттарын харчытын биир күн иһигэр киллэрдилэр.
7а кылаас үөрэнээччитин Богдан Савастюк эбэтэ Нина Александровна рогалики, эриэхэ, аджика туустаах оҕурсу, борщ соҕотуопкатын аҕалбыт. «Барытын бэйэм оҕуруоппар үүннэрбит аһым”, — диэн этэр кини. Эмиэ ити кылаас үөрэнээччилэрин Руслан уонна Ирина Расчесова ийэлэрэ Виктория облепихаттан муорус оҥорбут, сиробун Бурятияттан аҕалбыт. Ону таһынан, быар бөрүөгүн, хортуоппуйдаах бэрэски астаабыт. 1а кылаастар тээлэйдээх, хаппыысталаах бөрүөк, оливье салаат, бичиэнньэ, ыһаарыламмыт собо, тиэстэҕэ буспут сосиска аҕалбыттар.
Дьүүллүүр сүбэ чилиэннэрэ ким туох аһы мааны сандалыга тардыбытын көрөн сыаналаатылар. 1-4 кылаастарга 1 миэстэни 2а кылаас, 2 миэстэни 3а, 3 миэстэни 1б, 4а кылаас ыллыллар. 5-8 кылаастарга 1 миэстэни 5б, 2 миэстэни 5а, 3 миэстэни 8б кылаас үллэһиннилэр. 9-11 кылаастарга 1 миэстэҕэ 9а, 2 миэстэҕэ 10б, 3 миэстэҕэ 9в кылаас тигистилэр.
"Куонкуруска турар миэстэни бастыҥ киэргэтии" түһүмэххэ - 1а, 2б, 3б, 4б бастыҥнар кэккэлэригэр киирдилэр. «Төрөөбүт дойдум кэрэтэ» түһүмэххэ - 2б, 3а, 8б кыайдылар. Саамай улахан оҕуҥруот аһын үүннэрэн, «Оҕуруот бухатыыра» түһүмэххэ - 2б, 3а, 4а, 7б инники күөҥҥэ таҕыстылар. Сэдэхтик көстөр оҕуруот аһын аҕалан, «Оҕуруот экзотиката» түһүмэххэ - 2а кылаас бастаата.
Онон оҕолор бириистээх миэстэҕэ тиксэн, аҕалбыт астарын хото атыылаан, ырыаҕа-үҥкүүгэ кыттыһан, төһө даҕаны хотуттан сытыы тыал бастакы хаары кыыдамнаппытын иһин, астынан-дуоһуйан тарҕастылар.
Хаартыска: оскуола үлэһиттэрин түһэриитэ.
-
5
-
0
-
0
-
0
-
0
-
0
