Саҥа социальнай эбийиэк 51 куойка-миэстэҕэ анаммыт, уопсай иэнэ – 5 тыһ. кв.м тахса. СӨ Тутууга министиэристибэтигэр бэлиэтээбиттэринэн, интэринээт-дьиэ сыл бүтүөр диэри үлэҕэ киирэрэ былааннанар.
“Билиҥҥи туругунан тутаах тутуу түһүмэхтэрэ түмүктэннилэр: дьиэ көҥдөйө турда, сарайа оҥоһулунна, тас ааннар таҥылыннылар, ититии инженернэй тиһигэ уонна баһаарынай резервуардар турдулар. Лиип таҥыллан турбут уонна инженернэй ситим улахан аҥаара бүттэ”, — диэн биэдэмэстибэҕэ кэпсээбиттэр.
Билигин ис бараан үлэтэ ыытыллар, билииккэлэр, дьиэ үрдэ оҥоһуллаллар, тиэргэн күрүөлэнэр. Сынньанар уонна успуорт былаһааккатын таҥыы түмүктэнэр. Сотору кэминэн вентиляция тэрилэ уонна пандус туроруута барыаҕа.
“Маттаҕа тутуллар интэринээт-дьиэ Саха сирин социальнай эйгэтигэр сүрүн түгэнинэн буолуоҕа. Саҥа комплекс кырдьаҕастар уонна доруобуйаларынан хааччахтаах дьон тупсаҕайдык, бары аныгылыы усулуобуйаҕа үчүгэйдик бүөбэйдэнэн, реабилитацияны ааһан уонна сынньаналларын курдук тутуллар”, — диэн СӨ Тутуу министиэристибэтигэр бэлиэтииллэр.
Эбийиэк 2023 сылтан ыла “Демография” нгациональнай бырайыак иитинэн “Саастаах көлүөнэ” федеральнай бырайыагынан тутуллар (2024 сылтан ыла “Дьиэ кэргэн” саҥа национальнай бырайыакка холбоммута). Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.
-
0
-
0
-
0
-
0
-
0
-
0
