1990 сыл балаҕан ыйын 27 күнүгэр Саха Өрөспүүбүлүкэтин судаарыстыбаннай сүбэринитиэтин туһунан Дэкилирээссийэ ылыллыбыта. Бу докумуон эрэгийиэн олоҕун-дьаһаҕын уонна экэниэмикэтин салгыы сайыннарарга бөҕө тирэх буолбута. Ол курдук, бастакы Бэрэсидьиэммит Михаил Ефимович Николаев салалтатынан өрөспүүбүлүкэбит аныгы устуоруйатыгар саҥа түһүмэх саҕаламмыта. Михаил Ефимович эппит кэс тылларын Саха сирин нэһилиэнньэтин олоҕун хаачыстыбатын тупсарарга туһуламмыт судаарыстыбаннай бэлиитикэбитигэр тумус туттабыт. Кини үтүө аата махталлаах норуотун сүрэҕэр, өйүгэр-санаатыгар мэлдьи тыыннаах буолуоҕа.

ххх

Балаҕан ыйын 22-29 күннэригэр Национальнай бибилэтиэкэҕэ «ДТК — ааҕыы киинигэр» «Саха Өрөспүүбүлүкэтин Судаарыстыбаннаһын күнэ» кинигэ быыстапката үлэлиир.

Балаҕан ыйын 24 күнүгэр Саха академическай тыйаатырыгар 46-с тыйаатыр сезонун арыллыыта буолар. Сергей Зверев-Кыыл Уола аатынан Үҥкүү тыйаатыра «Кынчарҕаннаах харахтаах кырыылаах сутуруктаах Кыыс Кыыдаан бухатыыр» үҥкүүнэн дьүһүйүллүбүт олоҥхо испэктээги сүрэхтэниитэ буолан ааста.

Балаҕан ыйын 26-27 күннэригэр Дьокуускайга, Владивостокка, Хабаровскайга, Благовещенскайга орто уонна үрдүк үөрэх кыһаларын бастакы кууруһун устудьуоннарын күнэ ыытыллар.

Бүгүн Емельян Ярославскай аатынан Дьокуускайдааҕы кыраайы үөрэтэр түмэлгэ быыстапка-анонс көрүөххүтүн сөп. Эмиб бу күн Хаҥалас улууһун Чапаево сэлиэнньэтигэр Николаев Киинигэр – СӨ бастакы бэрэсидьиэнэ М.Е. Николаев бибилэтиэкэтигэр уопсастыбаннас мунньаҕа үөрүүлээх быһыыга-майгыга ыытыллыаҕа. Ону тэҥэ, Судаарыстыбаннас күнүгэр анаммыт уопсастыбаннас мунньаҕа Үөһээ Бүлүү, Бүлүү, Нам, Таатта улуустарыгар үөрүүлээх быһыыга-майгыга тэриллиэҕэ, өрөспүүбүлүкэ оскуолаларын 8-11 кылаастарыгар онлайн уруоктар буолаллар. Тыа сиригэр Судаарыстыбаннас уруоктарын ыытыахтара. Балаҕан ыйын 27 күнүгэр Дьокуускайга Саха Сирин Судаарыстыбаннаһа төрүттэнэригэр олук уурбут уһулуччулаах судаарыстыбаннай уонна бэлитиичэскэй диэйэтэллэргэ ытыктабылы уонна махталбытын биллэрэн туран: М.К. Аммосов, П.А. Ойуунускай, И.Н. Барахов, С.М. Аржаков, А.Е. Кулаковскай, В.В. Никифоров-Күлүмнүүр, С.В. Васильев, С.З. Борисов, В.П. Ларионов, И.Е. Винокуров, Ю.Н. Прокопьев, Г.И. Чиряев пааматынньыктарыгар-бүүстэригэр сибэкки дьөрбөтүн ууруохтара.

Аны Дьокуускайдааҕы кадеттар интэринээт-оскуолаларыгар «Кадет андаҕайыыта» диэн тэрээһин ыытыллыаҕа. «Арассыыйа – Мин устуоруйам» историческай пааркаҕа дьиэ кэргэн кэнсиэрэ уонна А.Е. Кулаковскай аатынан Норуоттар доҕордоһууларын дьиэлэригэр «Саха Сирэ–өрөспүүбүлүкэ биһиги сүрэхпитигэр» бырайыак тэриллиэхтэрэ.

Хаартыскалар эрэдээксийэ архыыбыттан