1990 сыл балаҕан ыйын 27 күнүгэр Саха Өрөспүүбүлүкэтин судаарыстыбаннай сүбэринитиэтин туһунан Дэкилирээссийэ ылыллыбыта. Бу докумуон эрэгийиэн олоҕун-дьаһаҕын уонна экэниэмикэтин салгыы сайыннарарга бөҕө тирэх буолбута. Ол курдук, бастакы Бэрэсидьиэммит Михаил Ефимович Николаев салалтатынан өрөспүүбүлүкэбит аныгы устуоруйатыгар саҥа түһүмэх саҕаламмыта. Михаил Ефимович эппит кэс тылларын Саха сирин нэһилиэнньэтин олоҕун хаачыстыбатын тупсарарга туһуламмыт судаарыстыбаннай бэлиитикэбитигэр тумус туттабыт. Кини үтүө аата махталлаах норуотун сүрэҕэр, өйүгэр-санаатыгар мэлдьи тыыннаах буолуоҕа.
Бүгүн Саха Өрөспүүбүлүкэтин Судаарыстыбаннаһын күнүгэр киэҥ-нэлэмэн төрөөбүт дойдубут бары улуустарыгар, нэһилиэктэригрэ үөрүүлээх тэрээһиннэр ыытылла тураллар. Балаҕан ыйын 27 күнүгэр Саха Сирин киин куоратыгар -Дьокуускайга өрөспүүбүлүкэбит норуоттарын олохторо-дьаһахтара туруктаах буолуутугар, Саха Сирин судаарыстыбаннаһын, сүбэринитиэтин турууласпыт, сыраласпыт, ытыктыыр дьоммут мэҥэ пааматынньыктарыгар сибэккини ууруу сиэрэ-туома толорулунна.
ххх
Ол курдук, өрөспүүбүлүкэ биир сүдү судаарыстыбаннай, бэлитиичэскэй диэйэтэлэ, Саха Өрөспүүбүлүкэтин аптаныамыйатын туруулаһан олохтообут Максим Кирович Аммосов пааматынньыгар сибэккини ууруу ыытылынна.
-Бу бэлиэ күҥҥэ биһиги Саха Өрөспүүбүлүкэтин судаарыстыбаннаһын олохтоспут чулуу дьоммутун ахтан-санаан, кинилэр сырдык ааттарыгар сүгүрүйэн ааһар ытык иэстээхпит. Бүгүн биһиги дойдубут сүбэринитиэтин, тутулуга суох буолуутун, уратытын, модун кыаҕын уонна сайдыытын бигэ тирэҕэ - дойдуга бэриниилээх буолуу хаһааҥҥытааҕар да күүһүрбүтүн көрөбүт. Норуот хаһан баҕарар салайааччыларын тула сомоҕолоһон кыайыыны ситиһэр. Биһиги улуу устуоруйбатыгар өрүү оннук буолбута, буола да туруоҕа. Онуоха элбэх омуктаах Улуу Арассыыйа норуота дойдутугар бэриниилээҕэ сүдү күүс буолар. Бүгүн Сахабыт Сирин аптаныамыйатын уонна судаарыстыбаннаһын төрүттэспит улуу дьоммутун саныах тустаахпыт. Ол курдук бүгүн биһиги саха чулуу уолаттарыттан биирдэстэрэ Максим Кирович Аммосов сырдык аатыгар сүгүрүйэн мустан турабыт, - диэн диктор сөҥ куолаһынан үөрүүлээх сиэр-туом саҕаланыытыгар эттэ.
Үөрүүлээх тэрээһиҥҥэ Саха Өрөспүүбүлүкэтин Судаарыстыбаннай Мунньаҕын (Ил Түмэн) бэрэссэдээтэлэ Алексей Еремеев, Саха Өрөспүүбүлүкэтин Бырабыыталыстыбатын бэрэссэдээтэлэ Кирилл Бычков уонна Максим Кирович Аммосов аатытынан Хотугу-Илиҥҥи федеральнай үнүбэрсиэт ректора Анатолий Николаев уонна Бырабыыталыстыба чилиэннэрэ, Ил Түмэн дьокутааттара, Саха Өрөспүүбүлүкэтин Ил Дарханын уонна Бырабыыталыстыбатын Дьаһалтатын бэрэстэбиитэллэрэ, Дьокуускай куорат Уокуруктааҕы дьаһалтатын салалтата, Дьокуускай куорат Дууматын дьокутааттара, Нам улууһун дэлэгээссийэтэ, Анал байыаннай дьайыы кыттыылаахтара, Саха Өрөспүүбүлүкэтин уонна Дьокуускай куорат Уопсастыбаннай палаталарын чилиэннэрэ, Саха Өрөспүүбүлүкэтин Ыччат парламеныттан, Максим Кирович Аммосов аатынан Хотугулуу-Илиҥи федеральнай үнүбэрсиэт үлэһиттэрэ уонна устудьуоннара кыттыыны ыллылар.
Алексей МАТВЕЕВ хаартыскаҕа түһэриитэ
-
3
-
0
-
0
-
0
-
0
-
0
