Уопсастыба

Виктор Никифоров, ландшафнай архитектор, «Саха Сирин ландшафнай киинин» генеральнай дириэктэрэ Дьокуускайга сүүрбэччэ сыл оту-маһы олордуунан дьарыктанар. Кинилэр Ленин проспегын, «Азимут» гостиница, «Сургутнефтегаз», «АЛРОСА» хампаанньа тиэргэнин о.д.а. эбийиэктэри, өрөспүүбүлүкэҕэ биллэр дьоннор чааһынай уһаайбаларын көҕөрдөллөр.

«Дьокуускай куорат баһылыгын сүбэһитэ Екатерина Павлова ыйан-кэрдэн биэриитинэн, болуоссакка кыайыы кырдалын, Иркутскайтан аҕалыллыбыт 15 күөх харыйаны, 18 көннөрү харыйаны, уопсайа 33 маһы олортубут. Ол мастарбыт 33 бухатыыр курдук Хабаров уулуссатын кыйа тураллар. «Водоканалы» кытта кэпсэтэн, уу турбатыгар холбонон, түүнүн ууну носуос көмөтүнэн автоматическайдык кутар ситиминэн хааччыйдыбыт. Атын куораттарга маннык мемориальнай өйдөбүнньүктэргэ үгэс быһыытынан газону олордоллор.

Күөх кырыһы олордорго хас да хампаанньа үлэлээтэ, «Адем» ХЭТ, «Саха Сирин ландшафнай киинэ», уутун кутууну «Бастакы устуудьуйа» Москубаттан анал тэрилтэ кэлэн холбоон биэрдэ. Уопсайа 6000 м2 иэннээх газон сиэмэтин от ыйыгар ыспыппыт биир ыйынан күөх от бытыгыраан таҕыста.

Газон куорат быылын оборор, оттон мас күлүгү биэрэр, от үчүгэйдик үүнэрин туһугар болуоссакка баар буору уларыттыбыт, хара буору, уоҕурдууну куттубут. Ото үүнэн истэҕин аайы тэпилииссэ үүнээйитин курдук кырыйан, көрөн-истэн иһиэххэ, буорун аһата сылдьыахха наада. Чээлэй күөх кырыс саһарбатын, куурбатын-хаппатын, силиһэ чөл буоларын туһугар кыра оҕону көрөр кэриэтэ болҕомтону, сыралаах үлэни эрэйэр», — диир Виктор Афанасьевич.

Кини этэринэн эһиил саас ыам ыйын бүтүүтэ Кыайыы болуоссатыгар күөх от бытыгырыахтаах уонна алтынньыга хаар түһүөр диэри күөҕүнэн сытыахтаах. Оҕолор, хамсыыр харамай тэпсибэтин, буорту оҥорботун диэн газон күрүөлэниэхтээх. «Күөх оту тэпсимэҥ, ону кэспит киһи ыстарааптанар”, — диэн сэрэтэр биллэриини туруорбуттар.

Мемориальнай Кыайыы кырдала Аҕа дойдуну көмүскүүр сэриигэ сырдык тыыннарын толук уурбут дьон кэриэһигэр ананар, ол иһин онно айдаарар, оонньуур, хаһыытыыр-ыһыытыыр, мээчиктиир көҥүллэммэт. Ландшафнай архитектор быһаарарынан, болуоссат аһаҕас буолуохтаах, ол иһин паарка курдук элбэх маһы сэлэлии олордуллубат. Кыайыы болуоссатыгар соҕотох турар хатыҥ уолаттарын сэриигэ атаарбыт ийэ уобараһын бэлиэтиир.

«Куоракка аһаҕас сир, кураанах буор-кумах бурҕайа сытыа суохтаах, тротуар ууруллуохтаах, күөх кырыс, от-мас олордуллуохтаах. Биллэн турар, бу барыта үбүлээһинтэн, бүддьүөккэ көҕөрдүүгэ төһө үп көрүллэриттэн улахан тутулуктаах. Кэлиҥҥи кэмҥэ элбэх искибиэр, уопсастыбаннай эйгэ аһыллар эрээри, биир-икки ыскамыайка, тротуар туруораллар, онон бүтэр.

Дьиҥэр, айылҕа баайын хостуур улахан хампаанньалар социальнай эппиэтинэс быһыытынан Сахабыт Сирин куораттарын, бөһүөлэктэрин көҕөрдөргө көмөлөһүөхтэрин, үбү-харчыны көрүөхтэрин сөп этэ. Ону олоххо киллэрэргэ бырабыыталыстыба таһымыгар анал бырыгырааманы ылыныахха наада. Оччоҕуна эрэ олорор сирбит, төрөөбүт дойдубут тупсан, сайдан, киэркэйэн иһиэ», — диэн этэр Виктор Афанасьевич.

Виктор Никифоров хаартыскалара.