Куоракка оту-маһы олордуу муниципальнай хантыраак уонна үтүө санаа аахсыйатын быһыытынан ыытыллар. Быйыл икки улахан эбийиэккэ: Кыайыы болуоссатыгар уонна Роман Дмитриев аатынан өрүс кытылыгар күөх кырыһы, маһы олордуу ыытылынна.
Өрүс кытылыгар уопсайа 891 үүнээйини, араҕас акацияны, даурскай боярышнигы уулуссаны күрүөлүү уонна Сибиир харыйатын олортулар. Ону автоматическай уу кутар тэрилинэн аан бастаан хааччыйдылар.
Иккис аан дойду сэриитэ түмүктэммит күнүгэр, балаҕан ыйын 3 күнүгэр Дьокуускай дьаһалтата “Кыайыы сирень сибэккитэ” диэн аахсыйаны ыыппыта. Аҕа дойдуну көмүскээбит хорсун буойуннары кэриэстээн, 80-ча сирень сибэккини үүннэрдилэр. Кэлиҥҥи сылларга куоракка уопсайа 530 сирень олордуллубута 2-3 сылынан сибэккилээн, бар дьону үөрдүөхтээх.
Бу күһүн Московскай искибиэргэ, Сыырка дьиэтин тула, Орджоникидзе болуоссатыгар, Чиряев искибиэригэр, Гагаринскай уокурукка маһы олортулар. Управаларга куораты тупсарыыга үлэлиир дьон ол үүнээйилэри көрө-истэ сылдьыахтара.
Күн бүгүн күөх үүнээйини олордорго, ону биэбэйдииргэ туһунан бырагыраама көрүллэ, ландшафнай дизайн оҥоһулла илик эрээри, бу хайысханан үлэ ыытыллыахтаах. Билиҥҥи туругунан оту-маһы олордуу «Дьокуускай куорат уокуруктарын үлэтин хааччыйыы» диэн 2024 с. алтынньы 29 күнүгэр бигэргэммит муниципальнай бырагыраама чэрчитинэн үбүлэнэр.
2025-2027 сс. ылыныллыбыт үс сыллаах былаан быһыытынан үүнэйини олордоллор, аны 7 сылынан тапталлаах куораппыт 400 сыллаах үбүлүөйүн чээлэй күөххэ сууланан, сибэккинэн симэнэн көрсүөхтээх.
Санатан эттэххэ, Ил Түмэҥҥэ хас биирдии тэрилтэ тиэргэнин тупсарыахтаах, оту-маһы, сибэккини олордуохтаах диэн сокуон ылыныллыбыта эрээри, ону толорооччу бэрт аҕыйах. Куорат дьаһалтата бу сокуон суолтатын тиэрдэргэ, күөх үүнээйини олордуу тэрилтэ имиджин тупсарар диэн быһааран биэрэргэ тэрилтэлэри кытта тустаах үлэни ыытар. Тиэргэни хомуйарга, оту-маһы олордорго субуотунньуктар ыытыллаллар, араас тэрилтэлэр, министиэристибэлэр, биэдэмистибэлэр тиэргэннэрин көстүүтүн тупсарарга саҥа идиэйэлэри, эстетическэй киэргэтиини бэлиэтииргэ Дьокуускайга төрдүс сылын «Киин куорат күөх кубога» диэн куонкурус ыытыллар.
Дьон-сэргэ оҕолорун кытта экскурсияҕа сылдьалларыгар анаан Дьокуускайга икки ботаническай саад үлэлиир. Криолитозона биологическай кыһалҕаларын үнүстүүтүн ботаническай саадын оранжереятыгар төгүрүк сыл троппическай уонна субтропическай үүнээйилэри көрүөххэ сөп. Маны таһынан, Кыайыы пааркатыгар оту-маһы олордубуттара биһиги тыйыс усулуобуйабытыгар бытааннык үүнэллэр, онон сиккиэр тыалга суугунуу турар күөх чараҥ үүнэн-силигилээн тахсарын өссө күүтүөххэ наада.
Хаартыска: Екатерина Павлова архыыбыттан.
-
0
-
0
-
0
-
0
-
0
-
0
